Inani lasebebanjwe umkhuhlane weCoronavirus eZimbabwe selikhwelile laya kwabangamatshumi amabili lasitshiyagalombili ngemva kokutholakala kwabathathu belomkhuhlane lo izolo.
Ugatsha lwezempilakahle luthi abathathu laba yizakhamizi zeHarare. Lokhu kutsho ukuthi idolobho leli selilabantu abalitshumi lantathu abaleCoronavirus.
Ugatsha lwezempilakahle luthi njalo abahlolwe umkhuhlane lo izolo bedlula amakhulu ayisitshiyagalombili, 841, kuthi inani lasebehloliwe elizweni lonke jikelele seliku-4,159. Asebefile balokhu bebathathu.
Emhlabeni jikelele umkhuhlane lo usubulele abantu abangu-177,234 njalo wahlasela abayizigidi ezimbili ezilengxenye, 2.5 million.
Ukukhwela kwenani labalomkhuhlane lo eZimbabwe kuza ngesikhathi inengi liqhubeka lingena emadolobheni ukuyadinga ukudla lezinye indingeko zempilo ezibalulekileyo.
KoBulawayo khona kubikwa kutshone kunyakazela enkabeni yedolobho izolo abantu bedinga imali emabhanga kuthi abanye ngekade bethenga ukudla ezitolo ezinkulu.
Olwela amalungelo oluntu uMnu Mbuso Fuzwayo uthi uzulu ufuqwa ludubo ukuthi aphume ezindlini lanxa nje uhlelo lokwenqabela iCoronavirus lusaqhubeka.
Kusenjalo, izakhamizi zalelidolobho zikhala ngokusilela kwempuphu lamanzi.
Zithi lezi ngezinye zezizatho ezibangela ukuthi ziphume ezindlini lanxa uhlelo lokuhlala ngekhaya ngenjongo yokwenqabela solwengeziwe ngamaviki amabili.
Uhulumende yena uthi ulenhlelo zokubona ukuthi umuntu wonke uthola impuphu ezitolo lanxa nje abanengi bengayitholi.
Sixoxe lesiphathamandla senhlanganiso yeBulawayo Progressive Residents Association uNkosikazi Violet Nxumalo.