Inani labantu asebebanjwe umkhuhlane weCoronavirus eZimbabwe selikhwelile laya kwabangamatshumi amabili lasitshiyagalolunye ngemva kokutholakala kwesinye isakhamuzi sakoBulawayo silomkhuhlane lo.
Ugatsha lwezempilakahle lwazise namuhla ekuseni ukuthi umuntu lo ubanjwe umkhuhlane lo ngoLwesithathu. Luthe luzakwazisa uzulu okunengi ngaye.
Lokhu kutsho ukuthi abantu asebebanjwe umkhuhlane lo koBulawayo sebelitshumi lanye. Asebebulewe yiCoronavirus elizweni lonke balokhu bebane.
Kusenjalo, lanxa uhulumende esithi seqalisile ukuphathisa abaswelayo abaphanjaniselwe impilo yikuvalwa kwelizwe ngenxa yomkhuhlane lo, abantu abanengi bathi labo bayaludinga uncedo ngoba sebehlaselwe yindlala ezindlini.
Inengi ebeliphila ngokubambabamba lithi seliphelelwe ngumphako njalo lidinga usizo ngokuphuthuma.
Uhulumende yena uthi seqalisile ukupha abantu abayisigidi imali ukuze bazinakekele. Kodwa limali ibikwa ingeneli lutho.
Umphathintambo wezemali uMnu Mthuli Ncube uthi uhulumende ukhethe labo abathola uncedo ngokukhangela ukuthi umuntu ulemalini ebhanga.
Kodwa umeli weBinga North edale lephalamende uMnu Prince Dubeko Sibanda uthi lokhu akusebenzi ngoba abantu abanengi kabagcini mali emabhanga ikakhulu abemaphandleni.
