Ibandla leMDC elikhokhelwa nguNkosazana Thokozani Khupe lithi lixotshise amalunga eMDC Alliance ekhokhelwa nguMnu Nelson Chamisa edale lephalamende izolo ngoba lifuna kukhanye sobala ukuthi ngubani umkhokheli weMDC.
Lelibandla lithi lilakho njalo ukuxotshisa amanye amalunga kaChamisa kudale elifanayo.
Usomlomo wedale lephalamende uMnu Jacob Mudenda wazise izolo ngokuxotshwa komeli weDangamvura uMnu Prosper Mutseyami, umeli weKuwadzana East uMnu Charlton Hwende, uSenator weMidlands uNkosikazi Lillian Timveos kanye loNkosazana Thabitha Khumalo oweProportional Representation ngemva kokulobelwa incwadi nguMakhupe esebenzelana loMnu Douglas Mwonzora loMnu Morgen Komichi.
UMaKhupe uthethe inyathelo leli ngemva kwesinqumo senkantolo yeSupreme Court esokuthi nguye owayemele akhokhele ibandla leMDC-T ngemva kokubhubha kukaMnu Morgan Tsvangirai, hatshi uMnu Nelson Chamisa.
Kodwa abakaChamisa bathi okwenzakale izolo lokho kungaphandle komthetho.
Sixoxe lesikhulumeli sikaMaKhupe uMnu Khaliphani Phugeni saqala ngokumbuza ukuthi ngabantu abathi basebenzelana leZanu PF.
UMnu Khaliphani Phugeni yisikhulumeli sikaNkosazana Thokozani Khupe. Sixoxe njalo lomunye wabaxotshiweyo ephalamende uNkosazana Thabitha Khumalo yena othi kusobala ukuthi uMaKhupe labanye bakhe basebenzelana lebandla leZanu PF.