Ibhanga elikhulu lomhlaba, eleWorld Bank, lithi lizakupha ilizwe leZimbabwe imali engangeUS$7 million yokulincedisa kunhlelo zokulwisana lokumemetheka komkhuhlane weCoronavirus lanxa nje lelilizwe lilesikwelede esikhulu kulelibhanga.
Ibhanga leli lazise ngoLwesithathu ukuthi iUS$2 million yalimali izaqanjulwa kusikhwama esikhangelane lokulungisa umonakalo owadalwa yisikhukhula sikaCyclone Idai nyakenye.
Lithe lanxa eleZimbabwe lingenelisi ukuboleka imali kulo ngenxa yesikwelede elilaso, lelibhanga likubone kufanele ukuthi liphathise ilizwe leli lamanye amazwe asesimeni sinye ngemali yokulwisana leCoronavirus.
Isinqumo lesi siza ngemva kokuba umphathintambo wezemali uMnu Mthuli Ncube elobele amabhanga omhlaba incwadi ngenyanga edluleyo ewazisa ukuthi uhulumende wakhe sephelelwe yimali njalo ucela uncedo.
EleZimbabwe likweleda iWorld Bank lamanye amabhanga afana leAfrican Development Bank kanye leEuropean Investment Bank imali engangeUS$1,2 billion.