Ibandla leMDC Alliance elikhokhelwa nguMnu Nelson Chamisa ngoLwesine lazise ukuthi selimise amalunga alo ephalamende ukuya kulelidale kulandela ukuxotshiswa kwamanye awo amane yiMDC-T kaNkosazana Thokozani Khupe kuliviki.
Ibandla leli lithi njalo selixotshe amalunga alo amathathu, uMnu Douglas Mwonzora, uMnu Elias Mudzuri loMnu Morgen Komichi ngoba besebenza leZanu PF loMaKhupe.
Lokhu kumenyezelwe yisiphathamandla seMDC Alliance uMnu Job Sikhala ngoLwesine emini, egcizelela izinqumo ezithethwe lidale leAlliance National Standing Committee ngoLwesithathu.
Amalunga eAlliance axotshiswe nguMaKhupe edale lephalamende abalisa umeli weDangamvura uMnu Prosper Mutseyami, oweKuwadzana East uMnu Charlton Hwende, uSenator Lillian Timveos oweMidlands kanye loNkosazana Thabitha Khumalo owakoBulawayo.
UMaKhupe uthi nguye osekhokhela ibandla kulandela isinqumo senkantolo yeSupreme Court esokuthi uMnu Chamisa wangena esikhundleni esatshiywa ngumuyi uMnu Morgan Tsvangirai ngokungekho emthethweni.
Kodwa uSikhala uthi umthethwandaba wanquma ngaleyondlela ngoba usetshenziswa yiZanu PF emizameni yokudiliza ibandla labo.
Wengeze wathi iMDC Alliance kayisoze inanze umhlangano weCongress oqoqwa nguMaKhupe loMwonzora owokukhetha inkokheli entsha njengokutsho kwenkantolo.
Uthe njalo inkokheli yebandla lakhe isazokhulumisana lamalunga ebandla ukuze iphume lezinqumo eziqinileyo.
“Akukho emthethweni ukuthi ibandla likaMaKhupe lixotshise amalunga eMDC Alliance. Ngakho ngiyakusekela ukuthi iAlliance imise amalunga ayo ukuya ephalamende,” kutsho ingcwethi kwezombusazwe uMnu Rejoice Ngwenya.
Eloba enkundleni yeTwitter uMnu Elias Mudzuri yena ukutshaye indiva ukuxotshwa kwakhe labanye bakhe kuMDC Alliance esithi kuyize. UMaKhupe laye uyakulandula ukuthi usetshenziswa yiZanu PF.