Amagqwetha amela abesifazana bakoBulawayo ababili abatshaywe ngamapholisa balimala kakubi avimbe ukuhluzwa kwaloludaba emthethwandaba ngoMgqibelo esithi kumele luphenywe kabanzi kuqala ngoba amapholisa akhanya ezama ukuluvalavala.
Amapholisa ayisithupha ebemele amiswe edale likamantshi phezu kwecala lokutshaya lokulimaza uNkosazana Nokuthula Mpofu loNtombizodwa Mpofu ebethesa umlandu wokwephuma umthetho wokuhlala ngekhaya emizameni yokwenqabela ukumemetheka kweCoronavirus.
Ababili laba ngumuntu lomnawakhe njalo bahlala eCowdray Park.
Omamangala bathi batshaywa ngamapholisa ayekhuluma ulimi lwesiShona esithi bayazenzisa ngoba bengaMaNdebele.
Imifanekiso yamanxeba abalawo iyethusa kanti njalo udaba lolu solucunule abantu abanengi.
Elinye lamagqwetha abamelayo uMnu Nqobani Sithole utshele umsakazo weStudio 7 ukuthi okubamangalise kakhulu yikuthi elinye ipholisa elimele libe ngumsolwa lalo yilo elikhokhela uphenyo lolu.
USithole uthi le yinto bangavumelani layo abafuna ilungiswe njalo omamangala baphiwe ithuba lokuqamba abahlukuluzi babo bebakhetha phakathi kwamanye amapholisa.