Umsekeli kamphathintambo wogatsha olubona ngokwethulwa kwemibiko uMnu Energy Mutodi uveze ukulwisana okukhanya sokukhona kubandla leZanu PF izolo ngemva kokuchothoza umphathintambo wakhe uNkosikazi Monica Mutsvangwa.
UMutodi uthi uMutsvangwa usebenzisa umsakazo kahulumende oweZBC lomyeni wakhe uMnu Christopher Mutsvangwa ukulwisa izitha zabo.
UMutodi wethule amazwi la enkundleni yokuxhumana ebulenjini eyeTwitter ngemva kokuba iZBC yethule udaba lapho umphathintambo obona ngobudlwano beZimbabwe lamanye amazwe uMnu Sibusiso Moyo axolise khona kuhulumende weTanzania phezu kwamazwi kaMutodi asnda kuwethula enkundleni ye Twitter.
UMutodi wachothoza indlela eleTanzania eliphatha ngayo imizamo yokulwisana leCoronavirus. Lokhu kukhanya kucunule uMutodi wahle wabhala laye esola uNkosikazi Mutswangwa lomkakhe.
Kodwa uphange wacitsha insolo yakhe kuTwitter lanxa ibisisabelele umhlaba jikelele.
Udaba lolu luza ngesikhathi omunye wabasekeli bakaMongameli Emmerson Mnangagwa uMnu Shingi Munyeza echothoze uhulumende kaMnangagwa ngempelaviki esithi ukhokhelwa ngabantu ababi abangamasela njalo abahlukuluza uzulu.
Ngokunjalo, uMunyeza uthe uhulumende lo ulakho ukuvukelwa ngabantu. Abanye bathi izehlakalo zombili lezi ziveza sobala ukuthi izinto azihambi kuhle kubandla leZanu PF. Ukuhlaziya loludaba sixoxe lesiphathamandla senhlanganiso elwela amalungelo oluntu eyeIbhetshu likaZulu uMnu Mbuso Fuzwayo.