Kulowesifazana osanda kuvela kweleSouth Africa obhubhele eMkoba Teachers College eGweru izolo, lapho okugcinelwe khona izizalwane zeZimbabwe eseziphenduke ekhaya zisahlolwa umkhuhlane weCoronavirus zingakayi emizini yazo.
Isikhulumeli sikahulumende uMnu Nick Mangwana uthi umufi ubeleminyaka yokuzalwa engamatshumi amathathu lanye. Kodwa kavezanga igama lakhe.
Lanxa abanye benakanela ukuthi umufi engaba ebulewe yiCoronavirus, uMangwana uthi imbangela yokutshona kwakhe isaphenywa.
Ugatsha lwezempilakahle lona luthi inani labantu asebebanjwe umkhuhlane weCoronavirus eZimbabwe lilokhu likumatshumi amane lasithupha ngoba phakathi kwabedlula inkulungwane abahlolwe izolo akekho otholakale elawo.
Luthi njalo abantu asebehlolwe lumkhuhlane elizweni lonke jikelele sebephose bafike kunkulungwane ezingamatshumi amathathu, 29,227.
Asebefile bona balokhu bebane kuthi asebesindile sebelitshumi lasitshiyangalombili.
AbeJohn Hopkins University bathi emhlabeni jikelele umkhuhlane lo usubulele abantu abangu-317,000 njalo wahlasela abafika phose izigidi ezinhlanu, 4,7 million.