amalinks wokungena

Breaking News

Impilo Kazulu Iba Lukhuni Ngamandla Ngenxa Yokukhwela Mahlayana Kwentengo Yezinto


Intengo yezinto ezibalulekileyo empilweni kazulu ezifana lempuphu, amafutha okupheka, itshukela, isinkwa lokunye ikhwele ngesilinganiso esikhulu phakathi kwamaviki amabili edluleyo.

Lokhu kutshiye abantu abanengi bekhala ngokoma kwempilo njalo bengazi lokuthi babambe ngaphi.

Uhulumende uthe esazisa kunyanga ezimbili ezedluleyo ukuthi usevumela njalo ukusetshenziswa kwemali yakwamanye amazwe egoqela idola leMelika njengalokhu okwenzakale ngo2009, inengi likujabulele lokhu licabanga ukuthi intengo yezinto yayizahlaliseka.

Kodwa lelothemba liphelele eboyeni njengezithukuthuku zenja nanku intengo yezinto phose zonke ikhuphuka mihla lamalanga.

“Itshukela ebithengiswa ngeZ$65 kusiya kuZ$66, isikuZ$150 kusiya kuZ$160 kusiya phezulu kusiya ngokuthi ukusiphi isitolo,” kutsho isikhulumeli senhlanganiso emela abathengi eyeNICORA uMnu Effie Dlela Ncube.

“Isepa ebithengiswa izolo lokhu ngeZ$50 isiku Z$110 kumbe Z$120 kusiya phezulu. Kulobunzima obukhulu osobehlele abantu.”

Amazwi kaNcube agcizelelwe yingcwethi kwezenotho uMnu Reggie Shoko yena othi imbangela yokukhwela mahlayana kwentengo yezinto lokhu yikuwa kwedola leZimbabwe, lona eliqhubeka lisiba mdambiyana nxa liqathaniswa ledola leMelika.

“Kungama lokuzamazama kudaba lokulinganiswa kwemali yethu ledola leMelika, ama-price ethu ayahlanya,” kutsho uMnu Shoko.

“Ungakhangela imbodlela yeCooking oil ebithengiswa ngeZ$165 ngeviki edluleyo, khathesi isithengiswa ngeZ$225 kusiya kuZ$235.”

Enye njalo ingcwethu kwezenotho uMnu Masimba Kuchera uthi okunye okubangela ukukhuphuka kwentengo mahlayana yikuthi abantu abanengi basebenzisa idola leZimbabwe ngoba eleMelika abalalo.

“Silabantu abalutshwana abalalo idola leMelika, abanengi basebenzisa idola lakuleli, lona elilahlekelwa ngamandla mihla ngemihla. Ngakho, ukubakhona kwemali yeMelika akwenelisi ukwenqabela ukukhuphuka kwentengo,” kutsho uMnu Kuchera.

Ngeviki edluleyo idola leMelika elilodwa belithenga amadola eZimbabwe angamatshumi ayisikhombisa lanhlanu emkambo wensitha njalo namuhla libikwa belehle kancane lisenelisa ukuthenga angamatshumi ayisithupha lanhlanu; 1:65.

Umphathintambo wezemali uMnu Mthuli Ncube wazise ngeviki edluleyo ukuthi uzakwazisa uzulu ngamanyathelo kahulumende ajonge ukwenqabela ukukhuphuka mahlayana kwenyengo yiloba nini.

Kodwa uShoko uthi kaboni lokhu kusebenza nanku uhulumende uke wathembisa ukwehlisa intengo yenyanga edluleyo wehluleka.

“Akula kungenela uhulumende angakwenza okungaphathisa, even engaze efake ama-price controls izinto ziyanyamalala ezitolo,” kutsho uMnu Shoko.

Abanye bathi uhulumende kumele esule imali yeZimbabwe kusetshenziswe idola leMelika lezinye izimali ezazisebenza ngo2009 kuphela ukuze umnotho uzinze.

Andubana lokho kwenzeke, uMnu Ncube uthi uzulu isebunzimeni obukhulu.

please wait

No media source currently available

0:00 0:05:26 0:00

Facebook Forum

XS
SM
MD
LG