Uzulu wakoMakhulela, ePlumtree, ukhala ngemihlambi yendlovu esihlasele kulesisigaba yadiliza izingadi njalo yagqibela leziliba emifuleni lapho okunatha khona izifuyo.
Indlovu lezi zibikwa zingena lasemizini yabantu zisidla amajondo.
Izakhamizi zithi lokhu kuzifaka engozini enkulu nanku kulabantu abedlula amatshumi amabili ababulawe zindlovu eZimbabwe nyakenye.
Isikhulumeli sezakhamizi uMnu Simon Maseko utshele iStudio 7 ukuthi okubakhathazayo kakhulu yikuthi lanxa sebebikele abezendle kanengi-nengi ngaloludaba, akulasizo esezilutholile.
Kusenjalo, isikhulumeli sogatsha lwezendle olweZimbabwe National Parks and Wildlife Management Authority uMnu Tinashe Farawo utshele lumsakazo ukuthi udubo olukhona ngendlovu eZimbabwe yikuthi sezizinengi kakhulu ukwedlula amadlelao azo, yikho nje sezingena ebantwini.
Kodwa uthe bayalwazi udubo lweMakhulela, njalo uthe sebethumele abazingeli babo ukuyadudula lezindlovu.
UMnu Farawo wengeze wathi indawo ezinengi ezifana leGwanda, eTsholotsho, eBikita, eZaka lazo zihlala zisiba lodubo olufanayo.