amalinks wokungena

Breaking News

ZCTU: Uhulumende Kumele Asungule Isikhwama Sokuhlenga Izisebenzi


Zimbabwe Congress of Trade Unions

Inhlanganiso emela izisebenzi eyeZCTU ithi lanxa isamukela inyathelo likahulumende lokuphathisa amabhizimusi ngemali engena kuZ$18 billion, uhulumende kumele ahlele enye njalo imali yokuphathisa izisebenzi.

Umphathintambo wezemali, uMnu Mthuli Ncube, izolo wethule imininingwane evesa sobala ukuthi amabhizimusi kumele enzeni ukuze akwelediswe limali.

Ezinye zalezindingeko zigoqela eyokuthi amabhizimusi kumele aveze ubufakazi bokuthi asesimeni esihle sokubhadala izikwelede lezi lobukakazi bokuthi ayabhadala imithelo kuZimra.

Uhulumende usungule isikhwama lesi ngenjongo yokuhlenga amabhizimusi kumthelela wokuvalwa kwelizwe ngenxa yigciwane leCoronavirus. Kodwa iZCTU ithi izisebenzi lazo kumele zithole usizo.

IZCTU ithi ukuvalwa kwelizwe ngenxa yeCoronavirus kutshiye izisebenzi ezinengi zingasela ndlela zokuziphilisa. Ngakho, ithi kumele lazo ziphathiswe nguhulumende.

Inhlanganiso le ikhala njalo ngokukhuphuka mahlayana kwentengo yezinto isithi osomabhizimusi sebephenduke baba ngabahuquluzi.

“Kukhanya bayakapula sibili lanxa kule-crisis enje. Bonke ubunzima esihlangana labo usomabhizimusi nguye obubuthelela phezu kwethu,” kutsho unobhala jikelele weZCTU uMnu Japhet Moyo.

Amazwi kaMoyo agcizelelwe yingcwethi kwezenotho uMnu Reggie Shoko.

“Osomabhizimusi labo balesandla kundaba yokukhwela mahlayana kwentengo… kulobugwelegwele obunengi obenzakalayo,” kutsho uMnu Shoko.

Ngeviki edluleyo kukhwele intengo yamafutha ezimota kanye lesinkwa. Kodwa lanxa ekhwelile, amafutha ephethulo ledizili aqhubeka esilela elizweni.

“Udubo lusukela ekuthengisweni kwawo amafutha ngamaBond khona osomabhizimusi abawathengisayo bewawoda ngamaUS$,” kutsho enye njalo ingcwethi kwezenotho uMnu Masimba Kuchera.

please wait

No media source currently available

0:00 0:04:45 0:00

Umphathintambo wezemali uMnu Mthuli Ncube uke wathembisa ukuthi uhulumende uzathatha amanyathelo okwenqabela ukukhwela mahlayana kwentengo yezinto. Kodwa uzulu ulokhe emelele.

Facebook Forum

XS
SM
MD
LG