amalinks wokungena

Breaking News

Isiphathamandla seDrax International Sizamiswa Enkantolo Namuhla


Isiphathamandla senkampani eyaphiwa i-contract yezigidi zamadola ezingamatshumi ayisitshupha eMelika nguhulumende ecatshangelwa ukuthi ilobudlelwano lomndeni kaMongameli Emmerson Mnangagwa, eyeDrax International, uMnu Delish Nguwaya, uzamiswa emthethwandaba namuhla.

UNguwaya ubotshwe ngoLwesihlanu wamiswa enkantolo ngoMgqibelo esetheswa amacala okuqambela uhulumende amanga okuthi inkampani le ilungisa amaphilisi, okwabangela ukuthi iphiwe umsebenzi wokudingela iZimbabwe amaphilisi lezinto zokuzivikela kumkhuhlane weCoronavirus.

Inkampani le yathengisela uhulumende amalembu okuvala amakhala lomlolo, ama-mask ngemali ephezulu kakhulu lanxa yona yayiwathenge phetsheya ngemali ephansi.

Lokhu kucunule kakhulu uzulu wahlokoma enkundleni zokuxhumana uhulumende waze waqume ubudlelwano bakhe lalinkampani.

Inkampani le ibikwa ithole umsebenzi lo ngendlela engacaci kuhle lanxa nje abacuphi babetshele uhulumende ukuthi uNguwaya ngumuntu ongathembekanga ngoba elamanye amacala avele ebhekane layo.

Inengi lithi kumele kubotshe iziphathamandla zikahulumende ezaphatheka ekupheni inkampani le lumsebenzi.

Umnikazi weDrax International uMnu Ilir Dedja oyisizalwane saseAlbania laye ubikwa edingwa ngamapholisa.

Kusenjalo, abesifazana bebandla leMDC Alliance abathathu ababotshwe ngeviki edluleyo besetheswa icala lokuqamba amanga ukuthi bathunjwa, bazamiswa emthethwandaba njalo namuhla lapho umantshi azakwethula khona isinqumo sakhe phezu kwesicelo sabo sokuthi bakhululwe ngemali yebail.

Abathathu laba nguNkosazana Joana Mamombe, uCecilia Chimbiri kanye loNetsai Marova, bona abathi bathathwa ezandleni zamapholisa ngabantu abanakanelwa ukuthi basebenzela uhulumende ngenyanga edluleyo bayabatshaya njalo babahlukuluza ngokocansi.

Facebook Forum

XS
SM
MD
LG