amalinks wokungena

Breaking News

Idola leZimbabwe Liqhubeka Ligugudeka Emkambo Osemthethweni Lowensitha


Zimbabweans compare the new note with the U.S. dollar note following the introduction of new notes by the Reserve Bank of Zimbabwe in Harare, Nov, 28, 2016.

Idola leZimbabwe ebelilingana lamadola eMelika angamatshumi aphose afike kwayisithupha, 1:57.36, ngeviki edluleyo emkambo osemthethweni liqhubeke lilahlekelwa luhlonzi ngoLwesibili lapho isilinganiso lesi esikhwele khona saya ku-1:63.74.

Ngamanye amazwi, idola leMelika elilodwa selilingana lamadola eZimbabwe aphezu kwamatshumi ayisithupha, iZ$63.74 lisuka kuZ$57.36 ngeviki edluleyo.

Kodwa emkambo wensitha libikwa lidlalela phezu kwamadola alikhulu.

Ukuwa kwemali yeZimbabwe lokhu kuza ngesikhathi amanye amabhizimusi esesala ukwamukela ama-bond notes esithi afuna imali yangaphandle kwelizwe.

Amabhizimusi la abikwa esala ukwamukela ikakhulu i$2 bond kuthi amanye ngabikwa bengasavumi ukuthengisa ezinye izinto ngemali yakuleli ngoba efuna amaRand kumbe idola laseMelika.

Le yinto esolwa kakhulu yinhlanganiso yezisebenzi, iZCTU.

Unobhala jikelele walinhlanganiso uMnu Japhet Moyo uthi ukuthengisela abantu ngemali yakwamanye amazwe bona beholiswa ngedola leZimbabwe kulethela uzulu ubunzima.

“Uhulumende ngabe kazange amise ukusebenza kwedola leMelika kwakuzakuba lula ebantwini,” kutsho uMnu Moyo. “Ngaleso sikhathi amashop-eyezabona ukuthi engancenda njani abantu.”

Kodwa usomabhizimusi uMnu Abednico Bhebhe uthi okwenza abanye bathengise ngemali yangaphandle kuphela yikuthi labo bayabe bethenge lezo zinto ngemali yakwamanye amazwe.

“Osomabhizimusi abanengi izinto abazithengisayo ezinengi bayabe beziwode ngemali yakwamanye amazwe. Yikho nje becina bethengisa lezo zinto ngemali yaphandle,” kutsho uBhebhe.

Lanxa kunjalo, uMnu Moyo uthi osomabhizimusi laba balakho ukulahlekelwa yibhizimusi ngoba bebalutshwana abazathenga izinto zabo.

Uthi izisebenzi kumele ziholiswe ngedola leMelika ukuze zenelisa ukuziphilisa kuhle.

“Nxa bezaqhubeka benika abantu imali abayiyalayo bona sizabona ke ukuthi ngubani ozaqhubeka ethenga izinto zabo. Esizakubona yikuthi izitolo ezinengi zizavalwa,” kutsho uMoyo.

Izisebenzi ezigoqela ezikahulumende kanye lezamankampani azimeleyo zithi kumele ziholiswa ngedola lakweleMelika nanku imali yeZimbabwe isingamaphepha nje angasathengi lutho.

Sikhuluma nje abongi ezibhedlela zikahulumende baphakathi kokukhalala umsebenzi phezu kwaloludaba.

Izakhamizi emaphandleni lazo ziwisa ezimathonsi ngokoma kwempilo. Siphakathi kobunzima, letiye asisayazi. Siyahawula,” kutsho isakhamuzi seGwanda uNkosikazi Sithembile Ncube.

Ngaphandle kokwala ukwamukela ibond, abanye abezitolo babikwa bethengisa izinto zabo ngentengo ephindwe kanengi-nengi nxa umuntu esebenzisa ibond, kuthi angasebenzisa iRand kumbe idola leMelika leyo ntengo ibe phansi kakhulu.

Ngokunjalo, uzulu laye ucina ebona kungcono ukuthi asebenzisa imali yangaphandle kulokusebenzisa iBond. Kodwa njengokutsho kweZCTU, udubo lusuke lube sekuthini izisebenzi aziyitholi leyo mali ngoba zihola ngedola leZimbabwe.

please wait

No media source currently available

0:00 0:06:37 0:00

Facebook Forum

XS
SM
MD
LG