Umama kamkhokheli webandla leMDC Alliance uMnu Nelson Chamisa ubekiwe emzini wakhe eChidyamakuni koGutu ngoLwesithathu lapho aphelekezelwe khona zinkulungwane zabantu.
Umkhokheli weMDC-T uNkosazana Thokozani Khupe laye ubehambile emngcwabeni lo kodwa uphenduke esangweni ngemva kokuvinjwa ngabasekeli beMDC Alliance.
UChamisa ubikwa ebiziwe waphuma ukuthi ayekhuza abasekeli bakhe angenise uMaKhupe labanye ekade ehamba labo kodwa wathola sebehambile.
Emazwini akhanya ebengawokusola isehlakalo lesi, uChamisa uxwayise abantu ukuthi bafunde ukuhlalisana lanxa bengaboni ngaso linye.
La ngamazwi agcizelelwe njalo ngumsekeli wakhe uMnu Tendai Biti.
Isikhulumeli seMDC-T uMnu Khaliphani Phugeni utshele iStudio 7 ukuthi uChamisa ubefuna bangene kodwa basuke bazihambela besesaba ukuthi kungacina kusiba lodlakela.
