UMongameli Emmerson Mnangagwa izolo wethule iziqondiso ezintsha athi ngezokwenqabela ukumemetheka komkhuhlane weCoronavirus ezigoqela esokuthi kusukela namuhla akula muntu omele abonakale phandle kungatshaya ihola lesithupha ntambama kusiya kuhola lesithupha njalo ekuseni, okuthiwa yi-curfew ngesiNgisi.
Kumbiko awethule ntambama uMnangagwa uthe abantu kabasavunyelwa ukuhambahamba njengakuqala; ngakho uthe umuntu wonke kumele ahlale ngekhaya.
Uthe abavunyelwa ukuya emsebenzini ngabaqhuba imisebenzi ebalulekileyo empilweni kazulu kuphela abafana labezempilakahle.
Uthe uzulu uzavunyelwa ukuphuma kuphela nxa esiyathenga ukudla lokuyakukha amanzi.
UMnangagwa uthe njalo amabhizimusi lawo asezavunyelwa ukuvula ngo8 O’clock ekuseni avalwe emini ngo3 O’clock.
Uthe njalo imikambo yokudla izaqhubeka ivuliwe kuthi abaphila ngokuthengisa ababhalisa kuhulumende yibo abazavunyelwa ukusebenza.
Wengeze wathi imibuthano efana leyokukhonza leyombusazwe ayisoze ivunyelwe. Lokhu kuza ngesikhathi uzulu eqoqa ukutshengisela mhkala 31 kulinyanga phezu kokonakala komnotho welizweni ngenxa yenkohlakalo.
Phansi kweziqondiso lezi abantu abazabaleka kuma-quarantine centers kumbe abazathelela abanye umkhuhlane weCovid-19 bekwazi ukuthi balakho balakho ukuvalelwa ejele.
Amazwi kaMnangagwa aze ngalanga linye lapho uhulumende azise khona ukuthi usevale amanyuvesi lamakolitshi abesevulile ukuze kwelihle ingozi yokuthelelana umkhuhlane lo.
Abafundi sebezaqhuba izifundo zabo ebulenjini be-internet bengayi emakilasini.
Unobhala jikelele wenhlanganiso emela izisebenzi iZCTU uMnu Japhet Moyo utshele iStudio 7 ukuthi uMnangagwa wayemele akhulumisane labaqhatshi lenhlanganiso zezisebenzi babonisane ngodaba lolu engakathathi isinqumo sokuvala ilizwe.
Ingcwethi kwezombusazwe uMnu Zenzele Ndebele yena utshele lumsakazo ukuthi abantu kumele behlale ezindlini ngoba belakho ukutshaywa ngamasotsha lamapholisa bengaphuma phandle.