Ukuvalwa kwamankampani atshiyeneyo buthumuthumu ngemva kokuba izisebenzi zawo zibanjwe umkhuhlane weCoronavirus kuzaphazamisa kakhulu umnotho welizwe, wona ovele uziqhulela njalo kulakho ukubangela ukuthi amanye awo abhidlike kokuphela, kutsho ingcwethi kwezenotho.
Amankampani alengatsha ezivaliweyo endaweni ezitshiyeneyo zelizwe agoqela iEconet, iOK, iPick n Pay, lamanye.
“Ukuvalwa kwamankampani lokhu kuzaba ludubo sibili ngoba amankampani amanengi ebevele ethwele nzima,” kutsho ingcwethi kwezenotho uMnu Masimba Kuchera.
Ukuvalwa kwamankampani la kuza ngesikhathi uzulu laye ekhala ngokoma kwempilo. Inengi alisasebenzi ngenxa yokuvalwa kwelizwe emizameni yokwenqabela ukumemetheka kweCovid-19.
Lanxa uhulumende esithi uphakathi kokuqhuba uhlelo lokuphathisa abantu abazisebenzayo lozulu jikelele ngemali yokuthenga ukudla, inengi lithi alikayiboni libani.
“Imali ayikabikhona, abantu abakayiboni. Uhulumende wayethe ngoApril kodwa lanamuhla sokunguJuly,” kutsho isiphathamandla senhlanganiso emela abaphila ngokuthengisa eyeBulawayo Vendors and Traders Association uMnu Michael Mdladla Ndiweni.
Amazwi kaNdiweni agcizelelwe yisiphathamandla senhlanganiso emela abathengi eyeNational Consumer Rights Association uMnu Effie Dlela Ncube yena othi uzulu laye uthwele nzima.
“Namankampani amanengi alakho ukudilika kanti lozulu laye uthwele nzima ngoba akulancedo abantu abalutholayo,” kutsho uMnu Ncube.
Lanxa inengi lisithi aliluboni uncedo oluvela kuhulumende, umphathintambo obona ngokwethulwa kwemibiko uNkosikazi Monnica Mutswangwa utshele intathelizindaba kunsukwana ezedluleyo ukuthi banengi asebelutholile loluncedo.
Idola leZimbabwe lona liqhubeke ligugudeka namuhla nxa liqathaniswa leleMelika njalo lilahlekelwe yimiklomelo emithathu. Emkambo osemthethweni idola leMelika elilodwa belilingana lamadola eZimbabwe angu-76, kumbe 1:$76. Ngeviki edluleyo beliku 1:72.
UKuchera uthi umnotho ungaqhubeka uhamba ngonyawo lolu, kusiyafika ekupheleni komnyaka umumo uyabe usumubo ngokuphindiweyo.
