Amagqwetha sesole isinqumo somthethwanaba kamantshi esokuvimba uNkosikazi Beatrice Mtetwa ukuqhubeka eligqwetha lentathelizindaba etheswa icala lokuphehla umvukela, uMnu Hopewell Chin’ono.
Umantshi, uMnu Ngoni Nduna unqume izolo ukuthi uMtetwa kasamelanga amele uChin’ono ngoba eziphathe ngendlela eyisa umthethwandaba ngokubhala kuFacebook ukuthi uChin’ono ubotshelwe ezombusazwe.
Khepha uMtetwa yena ukulandule ukuthi nguye owaloba lumbiko.
Lanxa kunjalo, uNduna uthe uMtewtwa kumele acutshingulwe yinhlanganiso yeLaw Society of Zimbabwe njalo ajeziswe engafunyanwa elecala.
Igqwetha uMnu Kuda Hove utshele lumsakazo ukuthi ukuvinjwa kukaNkosikazi Mtetwa kuyindlela kahulumende yokwethusela amagqwetha alwela amalungelo oluntu.
Kodwa uhulumende yena uyakulandula ukuthi usebenzisa imithethwandaba ukwethusela lokuhlukuluza amagqwetha labantu abamphikisayo.
