amalinks wokungena

Breaking News

Ivideo Etshengisa Ukuthunjwa Kosakhulayo, uTawanda Muchehiwa Itshiya Abanye Bethukuthele


UMnu.Tawanda Muchehiwa.

Umfanekiso wevideo owethulwe kuthange liphephandaba lobulembu, ele ZimLive oveza ukuthi osakhulayo, uTawanda Muchehiwa wathunjwa njani enzikini yedolobho lako Bulawayo emini libalele isilethe ukuthukuthela lokwesaba okukhulu ebantwini abanengi.

UMuchehiwa, yena ongumzukulu womhleli walinkundla, uMduduzi Mathuthu, ulobe ngendlela ejulileyo njalo echasisa ngochuku ahlangana lalo aze ethunjwe mhlaka ziku 30 ngenyanga edluleyo ngaphambilini kombhikitsho owawumele wenziwe mhlaka ziku 31.

I-video le iveza izimota ezinhlanu ezalandela uMuchehiwa lezihlobo uAmandlenkosi loAdvent Mathuthu, abacina bebotshwa.

Izimota lezi zafika zagombolozela imota uMuchehiwa ayephakathi phandle kwesinye isitolo lapho athunjwa khona ngabantu ababehlome ngezibhamu abanakanelwa ukuthi ngabezomvikela abogatsha olwaziwa ngabalutshwana olweFerret.

UMuchehiwa uthi wahanjwa laye endaweni angayaziyo wayahlukuluzwa etshaywa okwamalanga amathathu.

Uthi njalo babemnathisa umthambiso wakhe besithi ungomunye wabazama ukugenqula uhulumende kaMongameli Emmerson Mnangagwa.

UMuchehiwa uthi abathumbi bakhe bamtshela njalo ukuthi babefuna ukujeziso umalumakhe uMathuthu labanye abalwela amalungelo kazulu abagoqela owesifazana uThandekile Moyo ngokusola umbuso weZanu PF.

UMuchehiwa wavumbuluka ngemva kokuba umthethwandaba unqume ukuthi amapholisa kumele amveze.

Abanengi ababone livideo njalo babala udaba lukaMuchehiwa bathi abalakuthandabuza ukuthi le yimisebenzi kahulumende.

Kodwa isikhulumeli sikaMnangagwa uMnu George Charamba, eloba enkundleni yeTwitter ubuze ukuthi uMuchehiwa lo uzenza bani yena lokuthi udubme ngani.

Ukuhlaziya loludaba uNtungamili Nkomo uxoxe lengcwethi kwezombusazwe uMnu Dumisani Nkomo.

please wait

No media source currently available

0:00 0:02:48 0:00


Facebook Forum

XS
SM
MD
LG