Ibandla leMDC Alliance lithi selilobele iZimbabwe Electoral Commission (ZEC) incwadi lidinga ukukhulumisana layo phezu kokhetho lwama-by-elections osolulesikhathi lungenziwa.
Lelibandla lithi lifuna njalo ukukhuluma ngoluhlu lwabalelungelo lokuvota, i-voters’ roll kanye lohlelo lokudweba kutsha imigoqo yezigaba, olwe-delimitation. Lokhu kuphume emhlangano weNational Standing Committee yalelibandla oqhutshwe izolo.
Ikomidi le ithe kumele kuguqulwe okunengi andubana kwenziwe ukhetho. Isole njalo ukuxotshiswa kwamalunga ayo edale lephalamende ayisithupha agoqela uMnu Tendai Biti libandla lePeople’s Democratic Party (PDP).
Ithembise ukuthi izabhoda ngelizwe isazisa abasekeli bayo ukuthi yiwaphi amalunga ephalamende asehlubukile kuleibandla aya kuMDC-T ekhokhelwa nguMnu Douglas Mwonzora.
Ibandla leli lisola njalo inyatheli elizanywa nguhulumende elokujezisa amalunga alo etheswa icala lokweyisa idale lephalamende ngokungasukumeli kumbe ukuhoza uMongameli Emmerson Mnangagwa. Sixoxe lomsekeli wesikhulumeli seMDC Alliance uMnu Felix Magalela Mafa Sibanda.
