EleMelika selinike eleUkraine izigidi ezilikhulu zama dola – US$100 million eyokuthenga izikhali zokulwisana leleRussia eletheswa umlandu wokubulala abantu mahlayana edolobheni leBucha, abedlula amakhulu amathathu abaphoselwa egodini elikhulu – imass grave.
Kuthiwa abanye babo babulawa ezindlini lemigwaqweni bengalwisani lebutho.
EleMelika lenze lokhu kulandela umbiko oqakathekileyo owethulwe nguMongameli Volodmiyr Zelenskyy izolo kuhlangothi lwezomvikela kunhlanganiso yeUnited Nations, iU.N. Security Council.
IReuters ibika ukuba uZelensky ukubeke sobala ukuba eleRussia lagongoda abantu makhaza labaphosela emgodini omkhulu njalo abanye abafayo batshiywa emigwaqweni lezindlini. UZelenskyy uthi eleRussia kumele lijeziswe ngoba libulele abantu njengenyamazana.
Kodwa eleRussia liyakuphika lokhu lisithi uhulumende kaZelensky nguye obolele abantu eBucha, Irpin lezinye indawo.
UMfundisi Useni Sibanda, omqondisi weZimbabwe Christian Council, uthi kunengi okwethusayo okwenzakala kwele Ukraine.
UMfundisi Ray Motsi, okuBaptrist Church koBulawayo, uthi lokhu kufana lombhuqazwe weGukurahundi.
UMotsi uthi okwenzakala kwele Ukraine kuzwisa usizi.
I-Associated Press ibika ukuba kulabantu abedlula izigidi eziyisithupha – 6 million asebebaleke kwele Ukraine bayaphephela kwamanye amazwe.
Okwamanye, abakhokhela umanyano weEuropean Union, iNATO labanye sebefuna ukufakela eleRussia ezinye izijeziso zenotho kulandela imibiko ethi babulala abantu mahlayana kwele Ukraine.