Esigabeni lapho esiphatha indaba zezizalwane zeZimbabwe esezihlala kwamanye amazwe, liviki sibe lethuba lokuxoxa loNkosikazi Sisa Sibanda-Ncube, ohlala esigabeni ese Indiana eMelika.
UNkosikazi Ncube ongomunye wabasungula uhlelo lokukhuleka bendawonye njengabomama abangamakholwa esiKrestu ecingweni lasenkundleni yebulenjini eyeZoom, utshele iStudio 7 ukuba baqalisa bebane kuphela kodwa khathesi sebebanengi abangena ecingweni ekuseni nsuku zonke bekhuleka ndawonye, bekhulekelana, beyabelana amacebo okuphila khatshana lasekhaya, okulemikhuba etshiyeneyo lokwebelana ilizwi lokwenza izifundo ezebhayibheli.
Injongo uNkosikazi Ncube uthi babona ukuqhakatheka kokuthi baxasane njengabomama ukumelana lenkinga abafika badibana lazo befika emazweni lapho abathuthela khona.
“Sananzelela ukuthi omama badibana lenhlupho zokubhekana lezilingo emitshadweni, ezimulini, ukuhlukunyezwa ezindlini, i-domestic violence, ukuhlutshwa ngabantwana abanye sebethatha amadrugs lokunye. Siyacebisana sikhulekelana sibona izimanga ngamandla omkhuleko i-power of prayer”, kutsho uNkosikazi Ncube.
Uqhubeke ethi balohlelo njalo lokukhuleka ubusuku bonke, i-All Night Prayer, kane ngomnyaka. Ngawonalu uMgqibelo mhla ka 16 Mabasa, 2022 balayo i-All Night Prayer enkundleni yokuxhumana eyebulenjini eyeZoom, ngakhoke banxusa bonke omama abalaleleyo ukuthi baze emthandazweni lo oweAll Night Prayer phansi kweqembu elingakhethi ukuthi ukhonza kuliphi ibandla, ungaba ungumKatolike, iMethodist, loba yiliphi ibandla lesiKrestu, ukhululekile ukumanyana labo kuqembu abalibiza ngokuthi “Under His Wings Prayerline”
