WASHINGTON DC - Amagqwetha alwela amalungelo oluntu aweZimbabwe Lawyers for Human Rights athi asesiya emthethwandaba ukuyaphikisa isinqumo seZimbabwe Electoral Commission esokukhweza imali ezabhadalwa ngabafuna ukuncintisa kukhetho luka2023.
Amagqwetha la athi athethe lelinyathelo emele oseke wancintisa kukhetho lukaMongameli uMnu Egypt Dzinemunhendzva, umeli weHarare North uMnu Rasty Markham kanye lolwela amalungelo kazulu uMnu Tapiwanashe Chiriga.
IZimbabwe Lawyers for Human Rights ithi abathathu laba bafuna inkantolo yehlise limbhadalo kungakedluli insuku ezintathu.
IZEC yazise ngoLwesihlanu ukuthi isikhuphule imali ezabhadalalwa ngabancintisa kukhetho lukaMongameli isuka kunkulungwane eyodwa yamadola eMelika, US$1,000, yaya kunkulungwane ezingamatshumi amabili, US$20,000.
Abafuna ukuba ngamalunga edale lephalamende bazabhadala inkulungwane eyodwa, US$1,000, yona ekhwele isuka kumatshumi amahlanu amadola, US$50.
Ingcwethi kwezombusazwe uMnu Effie Dlela Ncube utshele umsakazo weStudio 7 ukuthi okwenziwe yiZEC akukho emthethweni, ngakho uthi inkantolo kumele iphoqe likhoshini yehlise limbhadalo.
