amalinks wokungena

Breaking News

Ali Baba Dube: Ukufanisa Abadlali Bakulez’insuku loPeter Ndlovu Yizifiso Zika Themba loAmkela


Ali Baba Dube
Ali Baba Dube

Umqeqetshi olodumo uAli Baba Dube uthi ukufanisa abadlali bakulez’insuku lowayengukaputeni weqembu lesizwe, uPeter Ndlovu, yizifiso zikaThemba loAmkela.

UDube ubekhuluma emkhosini wokumbonga ngomsebenzi wakhe awenze esebenzela iqembu leHighlanders kanye lamaqembu abasakhulayo amela ilizwe oqoqwe ngabe Zimbabwe Football Forum. Udume ngokuba nguye umqeqetshi ololonge abadlali abalodumo ababalisa uMadinda, uAdam kanye loPeter Ndlovu njalo uthi akutshiphanga ukuthola omunye umdlali ozadlala njengoPeter.

Banika uAli Baba Dube izipho ezitshiyeneyo
Banika uAli Baba Dube izipho ezitshiyeneyo

“Hayi ah! Akula ozakuba njengoPeter, kakazalwa. Nxa ezakuba khona yikhona ezazalwa. Akula mfana ozayedlula uPeter lapha ebholeni. UPeter udlalele iHighlanders emncane eleminyaka elitshumi lanhlanu, wahamba wayadlala emazweni. Ngizakutshela ukuthi sahamba laboPeter sayadlala eAberdeen lapho esasidlalela endaweni elenkundla eziyithoba minwe mbili. Sasisithi nxa sifika enkundleni yethu sithole amakhiwa eseyigombolozele belanda ukuzobona uPeter. Waba nguye umdlali owadlala okwedlula abanye waphinda waba nguye njalo owahlohla kanengi.

“Ngemva kwalokho sadlala umncintiswano weFive A Side, esasingazake siwudlale kodwa sawufundela khonale. Sabumba amaqembu amabili njalo yithi esacina sihlangana sodwa kufinal kwanqoba iqembu elalilo Peter, kwaba nguye futhi umdlali ohamba phambili. Ngemva kwalokho sasuka sayadlala eWales kumidlalo kaIan Rush. Lakhonale uPeter wafika waba nguye umdlali owahlohla kanengi loba nje bonke babezama ukumaka yena kodwa amakhiwa wayewatshiya ngesiqubu.”

UAli Baba Dube ukhulums lentathelizindaba koBulawayo
UAli Baba Dube ukhulums lentathelizindaba koBulawayo

UDube uthi umuyi uNdumiso Gumede udlale indima enkulu ekuphumeleleni kwakhe ukuba ngumqeqetshi ohwatshe abadlali ababelodumo bedlalela iqembu leHighlanders.

“UGumede amaqembu abasakhulayo aweHighlanders wenza abaphezulu kakhulu. Ngikhumbula size siyedlala leqembu leMasvingo United kuUnder-15 kusadlala aboAdam. UGumede samtshiya lapha kodwa wathi uAdam ehlohla igoli lakuqala sezwa eseklabalala esithi Adamski, esefikile. Lapho amaqembu abasakhulayo ayedlala khona uGumede wayelandela kodwa omgcinisihlalo bakhathesi abafana ababazi. UGumede wabamazi uAdam eleminyaka elitshumi lanhlanu.”

Coach Ali Baba Dube receiving gifts from well-wishers.
Coach Ali Baba Dube receiving gifts from well-wishers.

Umgcinisihlalo wenhlanganiso yeZimbabwe Football Forum, uTerrence Malunga, uthi isifiso sakhe yikuba bonke abadlala indima enkulu ekuthuthukiseni umdlalo wenguqu bebongwe besaphila njalo uDube bekufanele ukuba beqale ngaye.

“Silapha ngoba sizokupha inhlonipho umqeqetshi olodumo ongubaba wethu njalo owangiqeqetsha mina kumaqembu abasakhulayo amela ilizwe. Waqeqetsha abadlali abanengi abasabalele umhlaba wonke njalo abanye babo babelodumo olumangalisayo. Sikubone kufanele ukuba simbonge esaphila.”

UAli Baba Dube uqale ukuqeqetsha amaqembu abasakhulayo aweqembu leHighlanders ngomnyaka ka1973. Uke wasebenzela amaqembu abalisa eleValencia ayelibumbe ndawonye lomuyi uLucky Dube, eleRailstars kanye leleBulawayo City.

Khathesi uleqembu lakhe eleAli Baba Dube Foundation njalo uthi abadlali bakhe abakhulisayo bayamsekela ngendlela ezitshiyeneyo ukuze leliqembu liphakame.

XS
SM
MD
LG