amalinks wokungena

Breaking News

Ervine: Akulahlwa Mbeleko Ngokufelwa


Craig Ervine
Craig Ervine

BULAWAYO - Ukaputeni weqembu labesilisa elimela ilizwe emdlalweni kakhilikithi uCraig Ervine uthi kukhona abakufundileyo njengeqembu loba nje benqotshwe kabuhlungu liqembu leWest Indies emdlalweni wesibili owohlobo lweTest.

Ekhuluma ekupheleni komdlalo wesibili owohlobo lwe Test abawudlale leqembu lezihlengeni eleWest Indies, wona ophele iqembu leZimbabwe linqotshwe nge innings lama runs amane, ukaputeni weqembu leZimbabwe uCraig Ervine utshele intathelizindaba zemidlalo ukuba abasoze belahle imbeleko ngokufelwa kodwa bazasebenzisa lumdlalo njengesifundo ikakhulu kubadlali abasakhulayo.

“Ungakhangela indlela uInnocent Kaia atshaye ngayo ibhola waphinda njalo wajika ngayo, lapho athethe khona amawickets amahlanu, ukudibanise lendlela uBrendan Mavuta, yena oke wangabi yingxenye yeqembu lesizwe okwesikhathi eside, adlale ngayo, lendlela iqembu ebesidlala lalo eleWest Indies elidlale ngayo ikakhulu kusigaba sakuqala, uzananzelela ukuba kunengi esingakusebenzisa ukuthuthukisa ukudlala kwethu njengeqembu kumidlalo ezayo,” kutsho uErvine.

“Ngibona ikusasa enhle kuqembu leZimbabwe ngoba lilabadlali abanengi abasakhulayo. Kumele iqembu leli lidlale imidlalo eminengi eyohlobo lweTest ngoba kufundeka lula nxa bedlala. Abadlali bakweleZimbabwe balesipho esokudlala umdlalo kakhilikithi kodwa kuzakuba nzima nxa bengadlali imidlalo eminengi eyohlobo lweTest,” kutsho uBrathwaite.

Ocubungula umdlalo kakhilikithi uPraise Dumi Dlakama uthi yena indlela iqembu leZimbabwe elidlale ngayo ikakhulu emdlalweni wesibili ikhomba ukuba usasemkhulu umsebenzi okumele wenziwe yinkokheli yeqembu eyokudinga abadlali abalohlonzi.

“Iqembu leChevrons litshengise ukuba alila abadlali abanengi abangawumela umsindo kuzinga laphezulu ikakhulu kulaba abatshayela ibhola ngoba eleWest Indies lingene kanye kuphela kwathi eleZimbabwe kumahlanda amabili omdlalo lehluleke ukufikisa inani elibuthelelwe ngeleWest Indies.

Lokhu kukhomba ukuba abafana abancane abasakhulayo abakakulungeli ukudlala bencintisa labamanye amazwe njengalokhu ebesikukhangelele,” kutsho uDlakama.

Iqembu leZimbabwe belingela abadlali ababalisa uSean Williams, uSikandar Raza, uRyan Burl, kanye loBlessing Muzarabani kumidlalo yomibili eliyidlale leleWest Indies enkundleni yeQueens Sports Club koBulawayo.

Umdlali oke wadlalela iqembu leNgilandi uGary Ballance, yena odlale indima enkulu ukuze umdlalo wakuqala uphele zingutshiki lobhanqa, laye ukhuthe umdlalo wesibili ngoba engezwa kuhle.

Umdlalo bukemele uthathe insuku ezinhlanu kodwa uhle waphela ngemva kwensuku ezintathu.

XS
SM
MD
LG