BULAWAYO - Ikolitshi leNational University of Science and Technology (NUST) lithi izakwehliswa indleko zesikolo ebisikhutshulwe yayafika kumadola eMelika angamakhulu ayisikhombisa lamatshumi amabili USD$720.
Lokhu kuza ngemva kokuba abafundi bekolitshi leli beqoqane ukuze bakhalale izifundo nxa izikhalazo zabo zokuthi indleko lezi zehliswe zingakhangelwanga. ISemester elidlulileyo abafundi bebebhadala imali engamadola eZimbabwe angamakhulu phose amathathu (ZWL286,800), ngokunjalo abafundi bazaqhubeka bebhadala leyo mali.
Bhekinkosi Sithole omunye wabafundi beNUST uthi inengi labafundi belizakwekela isikolo.
"Ukukhwela kwamafees asonto ebukekayo ngendlela ebikhwele ngakhona lathi besizibuza sizaphutsha yini izifundo zethu ezikolweni ngoba amafees esefakwe kuUSD and kudala ayengafiki $720. Nxa usukhangele iZimbabwe yonke jikelele balutshwane abebezakwanisa ukufunda eNust usukhangela ukuthi abantu bahola malini.”
UNkosazana Mollen Mthombeni, omunye wabafundi beNUST, uthi inengi labantwana belingeke lenelise ukubhadala imali le.
“Ukukhwezwa kwefees yeNUST obesekuyenzakele ukuthi ifike $720 vele ngokubona Keanu besengisithi sengiyekela ngoba abanye abantwana bengasoze beyikwanise inengi kakhulu besekuyikuthi uqale uyesebenza imali yeSchool fees since sebeyehlisile sokungcono.”
UNkosiakazi Nomathemba Sebele, umzali olomtwana ofunda eNUST njalo eyisisebenzi sikahulumende, uthi imali engako abakaze bayihole ngakho bebengeke benelisa ukuyibhadala. “Kuyasimangalisa njengabazali ukuthi sinje lathi siyakhala ngeholo ukuthi liphansi imali engaka shuwa sizayithatha ngaphi ngoba abantwana asila 1 kulabancane abafuna ifees.Kithi izisebenzi zikahulumende akula othola imali engako kuzakwenza ukuthi abantwabethu bayekele isikolo kucine kugcwala izigebengu elizweni.”
UNkosikazi Ruth Jele, umhlali wakoBulawayo, uthi ukufakwa kwendleko zesikolo ngemali yangaphandle kutshengisela ukuba eyakweleZimbabwe ayilethi ntuthuko kumnotho welizwe. “Esikubona kulokhe kusanda yikuthi zonke izinto lapha eZimbabwe sezifakwa nge U.S Dollar. Kambe nxa i-fees yeNUST ingaya ku USD$720, bangaki abantu abayiholayo. Uhulumende kavume ukuba kusetshenziswe iUSD nje, ngoba ama salaries yiwo kuphela afakwe nge ZWL. Sincindezelekile njengabahlali bakuleli.
Imizamo yokuxhumana lomphathintambo wogatsha olubona ngemfundo ephuzu uSikhwicamfundo Amon Murwira ayiphumelelanga ngoba ucingo lungangeni. Kodwa, uMnu. Thabani Mpofu, isikhulumeli seNational University of Science and Technology, wale ukuthatshwa ilizwi kodwa uchaze ukuba udaba lwendleko zesikolo seluxazululiwe. Ngokunjalo abafundi sebebuyela ukuyathola izifundo zabo.
Umongameli wenhlanganiso ekhangele abafundi eye Students Representative Council (SRC), uMuziwenkosi Sigidi Moyo ukhiphe umbiko ngehola letshumi lanye (11:00hr) ukuba sebekhulumisane leziphathamandla zesikolo kwavunyelwana ukubhadala indleko elingana leyehlandla elidlulileyo. Ukhuthaze abafundi ukuba baphange babhadale indleko zesikolo imali ingakaze yehle isisindo sayo.
Facebook Forum