WASHINGTON DC - Ibandla leCitizens Coalition for Change (CCC) leleZanu PF ajikelana aqatha phezu kokukhwela kwentengo yezinto kuliviki, okutshiye uzulu weZimbabwe esidla imbuya ngoluthi.
AbeCCC bathi lokhu kuveza sobala ukuthi iZanu PF siyehlulekile ukulungisa umnotho; ngakho kumele ikhitshwe embusweni kukhetho oluzayo.
Kodwa abeZanu PF bathi osomabhizimusi bakhweze intengo ngabomo besebenza leCCC ngoba bezama ukucaphula abantu ukuze bengavotili uMongameli Emmerson Mnangagwa lebandla lakhe.
Idola leZimbabwe lalo liqhubeka ligugudeka nxa liqathaniswa leleMelika nanku idola leMelika elilodwa selithengwa ngamadola aseZimbabwe aphakathi kwenkulungwane eyodwa elamakhulu ayisitshingalombili, Z$1,800 kusiya kunkulungwane ezimbili, Z$2,000.
“Kulesandla esithile esicatshileyo esiyiso esenza ukuthi kube lomumo wona lowo obangela ukukhelwa kwezinto,” kutsho ilunga leZanu PF uMnu Believe Gaule.
“Ngezinye indlela kuncedisa amabandla aphikisayo khonokho okwenzakalayo, kulimaza iZanu PF. Kwenziwa ngabomo, yi-sabotage sibili enkulu eyikuthi izondise abantu bacine bebona angani uhulumende akabavikeli.”
Kodwa amazwi kaGaule alandulwe lilunga leCCC uMnu Abednico Bhebhe yena othe, “Okwakuqala asivumeni ukuthi kule-problem ekhona, uGaule usola isandla esingekhoyo... Akulasandla lapha kulokwehluleka kweZanu PF.”
