WASHINGTON DC - Abalwela amalungelo abesifazana labantwaba bathukuthele phezu kokukhululwa kwabadlwenguli abayingxenye yabantu abazinkulungwane ezine, 4,000, abakhululwe emajele ngeviki ephelileyo ngemva kokuxolelwa nguMongameli Emmerson Mnangagwa phansi kohlelo lwakhe lwePresidential Amnesty.
Abanye babadlwenguli laba babonge uMnangagwa ngenjabulo enkulu.
Omunye wabo ocunule uzulu ngukhulu oveze ukuthi wadlwengula umntwana oleminyaka yokuzalwa eyisitshiyagalolunye, 9, njalo uthe ukhululwe ngemva kokupika okomnyaka owodwa kuphela.
Omunye njalo ngukhulu obekhanya engela mazinyo aphambili othi uvela koMurewa, yena obehlabela ngemva kokukhululwa ekhukhumeza uMnangagwa esithi ululuju lwenyosi ngokwalo.
Phansi kohlelo lwePresidential Amnesty, uhulumende uthi uMnangagwa ukhulula abantu asebeleminyaka yokuzalwa engamatshumi ayisithupha, 60 years, kusiya phezulu njalo asebesalelwe yizigwebo ezincane kanye labantwana, ama-juveniles.
Injongo ngeyokuqeda ukuminyaka emajele.
Kodwa abalwela amalungelo abesifazana bathi abadlwenguli akumelanga bakhululwe bengakaqedi izigwebo zabo ngoba lokho kuhlukumeza labo abadlwengulwayo.
Omunye wabalombono lo yisiphathamandla senhlanganiso elwela amalungelo abesifazana eyeWomen of Zimbabwe Arise (WOZA) uNkosazana Magodonga Mahlangu.
Isikhulumeli sogatsha lwamajele olweZimbabwe Prisons and Correctional Services uNkosikazi Meya Khanyezi ubengabambeki ecingweni njalo kaphendulanga imibuzo esimthumele yona.
Ngokufanayo, umphathintambo wezemithetho uMnu Ziyambi Ziyambi laye kaphendulanga imibuzo yethu.
Forum