BULAWAYO - Uyise kaMarvelous Nakamba uAnthony uxoxa ngensuku zakhe esadlala engunozinti.
UAnthony Nakamba uqale ukudlala ibhola esedolobheni leHwange lapho akhulele khona ngemva kokukhangwa yikudlala kukanozinti owayedume ngalezonsuku owayedlalela iqembu leHwange kanye leqembu elimela ilizwe uPosani Sibanda.
“Ngalezonsuku eHwange kwakulabonozinti ababalisa uPosani Sibanda njalo ngibe lothando lomdlalo wenguqu ngemva kokubabukela bedlala. Ngiqale ngadlalela iqembu leGiant Killers ebelidlala kuWankie Amateur Football Association (WAFA) ngasuka lapho ngayadlala kuqembu leZesa Hwange ngo1988 ebelidlala kusigaba seDivision One.
“Kuthe ngo1990 ngayadlalela iqembu leHwange ngingumsekeli kaJohannes Tshuma okweminyaka emihlanu kodwa kuthe ngo1995 ngabe ngithatheka ngatshiya umsebenzi ngaya elizweni leSouth Africa. Ngifike khonale ngayahlala elokitshini leAlexandra lapho engifike ngadlalela iqembu leAlexandra Blackpool ndawonye labadlali ababalisa uPatrick Chisikao labo Maimane Phiri.”
Akadlalanga okwesikhathi eside kuqembu leAlexandra Blackpool ngoba engakhululwanga liqembu leHwange kanye lenhlanganiso yeZimbabwe Football Association.
“Uyazi izinto zakudala ubusithi ungafika eSouth Africa untshintshe ibizo njalo mina ngake ngasebenzisa igama elithi Marvelous Khumalo. Kuthe ngemva kwenyanga eziyisithupha bathi bona kungcono ngizothatha amaphepha azakwenza ngidlale okusemthethweni kodwa abeqembu leHwange babefuna imali ngacina ngibuyela eSouth Africa ngisiyazisebenzela ngibamba lapha lalapha.”
Forum