BULAWAYO -- Sebeveze ithemba abaphatheke emdlalweni wenguqu ukuba imizamo eqhutshwa yinhlanganiso yeFederation of International Football Asociation (FIFA) izakwenza ukuba eleZimbabwe liqale njalo ukudlala lamanye amazwe.
Ukuvakatshela kweleZimbabwe okwenziwe liqula elibunjwa ngabathathu abathunywe yinhlanganiso yeFIFA ukuzoxazulula ingxabangxoza ebhekane lomdlalo wenguqu kweleZimbabwe kuchazwe ngumnikazi weqembu labasakhulayo eleGolden White uKhotso Nyathi njengesehlakalo esipha ithemba kulabo abaphatheke kulumdlalo.
“Nxa iFIFA ibuyile lapha izozama ukuthi incedise kuyasithabisa ngoba sesikwazi ukuba sekungafakwa ikhomithi engasekeli hlangothi esingabamba umsebenzi abantwabethu bedlale bencintisane labakwamanye amazwe. Kulula kabi ukukhuthaza umntwana nxa bekhona abayizibonelo ngoba bedlala emazweni kodwa nxa silapha sisodwa kuyabe kufana nje lokuthi akulanto esiyabe siyenza,” kutsho uNyathi.
Umdlali wenguqu uThabiso Ndlela uthi ukhulekela ukuba ilizwe leZimbabwe livunyelwe ukudlala lamanye amazwe ukuze kuvuleke amathuba awokuba bebonwe ngamaqembu akwamanye amazwe.
“Besisendaweni enzima njengabadlali kweleZimbabwe kodwa ngokuzwa kwethu ukuthi iFIFA isingenela silethemba elokuba mhlawumbe lathi sesingadlala sibonakale kumncintiswano efana loweCosafa. Sifisa ukuthi kuhambe kahle ngoba ibhola beselikhengelelwa phani kweleZimbabwe,” kutsho uNdlela.
Inhlanganiso yeFIFA ithumele uSolomon Mudege, uGelson Fernandes kanye loArtur de Almedida de Silva kweleZimbabwe njalo laba baqhube imihlangano labeSport and Recreation Commission kanye lomphathintambo wezemidlalo uKirsty Coventry.
Ilizwe leZimbabwe limiswe ukuphatheka kunhlelo zenhlanganiso yeFIFA ngoNhlolanja nyakenye ngemva kokuba abeSport and Recreation Commission bemise umsebenzi inkokheli yeZimbabwe Football Association ekhokhelwa nguFelton Kamambo yona ebisetheswa umlandu wokungaqhubi ngemfanelo umsebenzi wayo.
Kusenjalo imvimbi yeqembu leHighlanders uAndrew Tandi, yena obeselesikhathi eside engadlali ngemva kokwephuka unyawo, useveze ukujabula okukhulu ngemva kokuba esephindele enkundleni.
“Besengilomnyaka ngingadlali ibhola kodwa emdlalweni wethu leqembu leCaps United ngithe ngingena ngezwa ngijabula kakhulu. Labalandeli labo bangemukele ngenjabulo, okutsho ukuba kukhona okuhle engikwenza enkundleni,” kutsho uTandi.
Iqembu leHighlanders kusasa ngeSonto lizadibana leqembu leTriangle ngaseBarbourfields kuthi kweminye imidlalo iqembu leGreen Fuel lizadlala leleChicken Inn ngaseGibbo, iqembu leHwange lizangqikilana leleZPC Kariba ngaseColliery, iSheasham izadibana leNgezi Platinum Stars ngaseBata kuthi iqembu leSimba Bhora lizemukela eleManica Diamonds ngaseBaobab.
Sikhangele impumela yemidlalo edlalwe NgoMgqibelo, kusigaba seCastle Lager Premier Soccer League;
Iqembu leBulawayo Chiefs litshaye eleCaps United nge 2 ka 1 ngaseLuveve, iqembu leDynamos libe ngutshiki lobhanqa 0 ka 0 leleFC Platinum ngaseBarbourfields, iqembu leYadah linqotshwe nge 2 ka nya ngeleBlack Rhinos ngaseBaobab kuthi eleCranborne Bullets litshaywe nge 2 ka nya ngele Herentals ngaseNyamhunga.
Forum