BULAWAYO - Owayengumqeqetshi wamaqembu abalisa eleAmaZulu leleNjube Sundowns, uDaniel Ndlovu, uthi sebebalutshwana abasakhulayo abathakazelela ukudlala umdlalo wenguqu kulezinsuku.
UNdlovu uthi uhlonzi lomdlalo wenguqu kalusafani lakudala ngoba kunengi bona abakhula bekwenza okungasayenziwa ngabasakhulayo kulezinsuku.
UNdlovu uthi, “Umehluko omkhulu yilokhu ngesilungu esithi yipassion. Kudala abadlali benguqu besiqala sidlala ibhola lomphepha esikwakweni. Sisuke lapho siyedlala amafrido. Ubutshona ilanga lonke usebhoreni njalo lalabo ababeqeqetsha babekwenza ngoba belothando lebhola, hatshi uthando olwemali lokhu esesikubona namuhla.
“Lemitshina yakulezinsuku yiyo esisenza abantwana abancane betshone bebukele umabonakude, bedlalisa labomakhalekhukhwini, uthole ukuthi abaselandaba lokuyadlala ibhola lamaphepha ngoba sekulezinto ezinengi asebenzenza khathesi.”
UNdlovu uqale ukudlala ibhola eselokitshini leLuveve ngama 1980s lapho adlalele khona iqembu labasakhulayo, elaziwa ngokuthi yiManchester United. Uthe esuka lapho wadlalela amaqembu abalisa eleGold Star, eleVitafoam kanye leleHunyani lona acine eliqeqetsha.
UNdlovu uthi, “Kuqembu leAmaZulu ngihlale iminyaka phose emine ngasengisuka lapho ngaya kuqembu leNjube Sundowns ngesikhathi ikuPremier Soccer League lalapho isidlala kusigaba sikaDivision One. Ngemva kwalokho ngiqhatshwe liqembu leRailstars ngesikhathi selidlala kusigaba seDivision One.
“Ngilisebenzele iqembu leRailstars laze labhuluba ngasengisiya kuqembu leNew West lapho engihlale khona kwaze kwaba ngu2013. Ngemva kwalokho ngithethe isinqumo esokuba kengime ukuqeqetsha kwaze kwaba nyakenye lapho engicelwe khona liqembu leRatanang elaseCowdray Park.”
Iqembu leRatanang lisungulwe nyakenye njalo lidlala kusigaba seSouthern Region Division One Soccer League.
Forum