Taboka Ncube
Amapholisa aqhubekela phambili egcwele endaweni ezinengi zelizwe, ikakhulu emadolobheni kulandela ukwethulwa kwempumela yokhetho lukamongameli.
IZanu-PF ithi amapholisa la ahlose ukuvikela uzulu kodwa amabandla aphikisayo athi lokhu kwenzelwa ukwethusela lokuhlukumeza uzulu.
Ibandla leZANU-PF lithi ukugcwala kwamapholisa endaweni ezinengi zelizwe akumangalisi. Isikhulumeli salelibandla, uMnumzana Farai Marapira, uthi umuntu owethuswa lipholisa ngumuntu olecala.
“Thina esikwaziyo yikuthi isela yilo elesaba amapholisa. Thina amapholisa elizwe siyawethemba nxa sibona amapholisa ebhoda sizibona sivikelekile. Angazi ukuthi umuntu owesaba amapholisa uyabe efuna ukwenzani sibili,” kutsho umnumzana Marapira.
Unobhala webandla leFreedom Alliance, uMnumzana Nhlanhla Moses Ncube, uthi lonyaka iZANU-PF ayilathuba lokwenza ekufunayo.
“Okwakhathesi ngibona angani kuzakuba nzima ukuthi iZanu-Pf izakwenza ekufunayo ngemva kwemibiko ekhutshwe yiSADC lezinye inhlanganiso ngalolukhetho. Ngibona iZanu-PF isigquleke amadolo,” kulandisa uMnumzana Ncube
Ekhuluma leStudio7, uMnumzana Fortune Mlalazi, owebandla leCitizens Coalition for Change, uthe amapholisa ahamba ehlukumeza abantu.
“Amapholisa agcwele indawo zonke ehlukuluza abantu. Lokhu kuvele kwejayelekile ukuthi uhulumende asebenzise amapholisa lamasotsha ukuthi ahlukuluze. Uhulumende uyakwazi ukuthi abantu bafuthelene ngenxa yokutshontshwa kokhetho.”
Kumbiko okhutshwe ngoMgqibelo, isikhulumeli samapholisa, uAssistant Commissioner Paul Nyathi, uthe kulokuthula elizweni njalo amapholisa aqhuba umsebenzi wawo owokuvikela abantu.
Isikhulumeli sikamongameli, uMnumzana George Charamba, uxwayise abantu ukuthi bengayengeki batshengisele, njengoba belungiselele ukumisa lokhu. Usole njalo umbiko weSADC ngokhetho olusanda kuqhutswa.
Kusenjalo, unobhala wenhlanganiso yabalwa impi eyeZimbabwe National Liberation War Veterans Association, uMnumzana Douglas Mahiya, ekhuluma lentathelizindaba eseHarare, uthe umsebenzi wenhloli zokhetho ezeSADC ngowokuhlola ukhetho kuphela hatshi ukukhokhela lolukhetho. Wengezelele esithi ilizwe leZimbabwe alingeke latshelwa okokwenza ngumuntu owehluleka ukukhokhela insonto.
Forum