Abalandeli bomdlalo wenguqu bathi umkhankaso weqembu le Highlanders emidlalweni yalonyaka eye Champions League ufika emaphethelweni ngensonto ngoba kungela ndlela i Bosso enganqoba ngayo intshantshu zezwekazi le Africa.
Inengi labalandeli benguqu edolobheni lakoBulawayo lithi lizakuya emagumeni ngensonto hatshi ngoba lilethemba lokuba iqembu lasekhaya linganqoba kodwa kungenxa yokufuna ukubona iqembu elingelesithathu kumaqembu adlale kuhle ibhola ngomnyaka ophelileyo emhlabeni wonke jikelele.
URobson Chisale uthi udane kakhulu esizwa kuthiwa abadlali abafana lo Mahamed Aboutrika kanye lo Mahomed Barakat kababuyanga leqembu le Al Ahly ngoba ubefisa ukubabukela mathupha emagumeni ngensonto esithi lokhu kungamenza alaluke engasayanga enkundleni ngoba indleko zokubukela lumdlalo ziphakeme kakhulu.
Endaweni ezingelamthunzi kuzabe kubiza inkulungwane ezilitshumi zamadola akuleli kuthi emaceleni lapho okulomthunzi khona kuzabe kubiza inkulungwane ezingamatshumi amabili kuthi ngaku VIP kuzabe kubiza inkulungwane ezingamatshumi amahlanu.
Komunye umdlalo ofanayo i Mwana Africa yakuleli izemukela i Interclubbe yase Angola kuhlandla lakuqala lesigaba sakuqala senkezo ye Confederations Cup enkundleni yase Rufaro kusasa.
Intathelizindaba yethu yezemidlalo u joseph njanji usipha loludaba ndawonye lezinye.