Amaqhinga asetshenziswe liqembu le Highlanders kuhlandla lakuqala lomdlalo walo leqembu le Al Ahly asuke awela phansi njengezithukuthuku zenja njengoba amagipite efike alitshayela kabili emambuleni kungela mpendulo evela kumajaha amahlolanyama.
I Highlanders idlale ngendlela edide abalandeli bomdlalo wenguqu abanengi emdlalweni wakuqala lapho idlalisa isikhathi yona kuyiyo ebidlala isekhaya njalo ingcazelo ephiwe uzulu ngabaqeqetshi baleli qembu yikuba injongo yabo bekuyikuvikela i Al Ahly ukuba ingahlohli ukwenzela ukuba ithwale nzima nxa sekuyiyo esekhaya kodwa akusabanga njalo ngoba i Bosso yehluleke ukuhlohla.
Kusenjalo inengi labalandeli beqembu le Highlanders lithi kalidananga kangako ngokudliwa kweqembu labo ngoba besithi lidliwe zintshantshu ezingabuzwayo. Komunye umdlalo ofanayo ukusebenzisa ithuba lokudlala ekhaya kuqala okwenziwe yi Mwana Africa kuyincedile ngoba ifike yavala ngebhetshu e Angola umdlalo wayo le Inter Clubbe yakulelo waphela uyi zero ka zero njalo sekuhlanganiswa impumela zemidlalo yomibili iqembu lakuleli linqobe ngemiklomelo emibili ka nya.
Ingcitshi zomdlalo kakhilikithi zithi ukungatshengiswa kumabonakude kwemidlalo yeqembu lesizwe eliphatheka kumncintiswano we cricket world cup kubisela phansi umdlalo kuleli.