Umgcinisihlalo welinye lamacele e MDC elikhokhelwa nguMnumzana Morgan Tsvangirai, uMnumzana Isaac Matongo kasekho.
UMatongo, obeleminyaka engamatshumi ayisithupha, i 60, ubhubhe lamuhla emadabukabusa esebuthongweni njalo utshiye abantwana abathoba minwe mbili labazukulu abalitshumi lantathu lamakhosikazi amabili. Umuyi wake waba ngumsekeli kamkhokheli we nhlanganiso ezilwela amalungelo ezisebenzi iZCTU kanye le National Engineering Workers’ Union.
Umsekeli kamkhokheli walelibandla, uNkosazana Thokozani Khuphe owasebenza lo Matongo isikhathi eside njalo othi umbone izolo eziphilele, lalamuhla esanda kubhubha ugcizelela ukuthi ibandla lakhe lilesithuli ngesehlakalo lesi.
Kunjalo nje, umsekeli kanobhala jikelele wecele le MDC elikhokhelwa nguMnumzana Arthur Mutambara, uNkosikazi Priscilla Musihairambwi Mushonga, ongomunye wababone uMatongo esanda kubhubha, utshele uSithandekile Mhlanga we studio7 ukuthi ibandla lakhe lemukele umbiko wemfa kamuyi ngokwethuka okwesabekayo ngoba loba wayengekho kucele labo, nguye owayephitsheke ngokuthi bemanyane njalo engumuntu owayekhuthele ebandleni.