Sokukhululwe amalunga enhlanganiso ye WOZA amahlanu abotshwe ngolwesithathu etshengisela ko Bulawayo, kwasala iziphathamandla zale inhlanganiso u Jenni Williams lo Magodonga Mahlangu.
UMahlangu lo Williams bakhangelelwe ukuya emthethwandaba kusasa.
Abakhululiweyo bathi batshaywe kubi besesitokisini njalo basesibhedlela se Galen House lapho abelatshwa khona.
Omunye wabakhululiweyo, uNkosazana Angeline Karoro, utshele istudio 7 okunengi ngokuphathwa kwabo esitokisini lecala abaletheswayo.
Kunjalo nje, uhulumende wele Melika wethule umbiko esola uhulumende we Zimbabwe ngokubopha lokutshaya amalunga e WOZA athi abetshengisela ngokuthula.
Uthi wethesa uhulumende umlandu ngokwenzakala kubo njalo uthi kabakhulule ngesiphangephange.
UJenni Willimas usanda kuthola isicoco sokuba lesibindi, ese International Women of Courage Award for Africa khonapha eMelika kusiphathamandla sikahulumende u Condoleeza Rice.
Inhlanganiso ye Zimbabwe Human Rights Forum layo imanyene lo hulumende we Melika ngokugcona uhulumende we Zimbabwe ngokubotshwa lokutshaywa kwamalunga eWOZA.