Inhlanganiso ebona ngokuqutshwa kokhetho, iZimbabwe Election Support Network, ZESN, ithi inane labalobisa amagama ukuthi bavote kukhetho lomnyaka ozayo liqansile kakhulu kwezinye izigaba.
Umbiko eliwukhuphe ngemva kokuhlolisisa uhlelo oluqhubekela phambili lokulotshwa kwamagama abazavota, iZESN ithi inengi labalobisa amagama ngabasemaphandleni ezigabeni zeMashonaland zona ezivele zisazakala ukuthi iZanu PF ilosekelo kakhulu.
Ngeviki edluleyo amabandla aphikisayo ethese uhulumende umlandu wokusa izisebenzi ezinengi ezibhalisa abantu kulezizigaba. Incwethi ecubungula ezombusazwe, uMnumzana Dumisani Nkomo, utshele uChris Gande weStudio 7 ukuthi uzulu uphakathi kokudinga okuqakathekileyo empilweni hatshi ukuyalayinela ukulobisa amagama okuvota.