Imidlalo ye Premier Soccer League ingena esigabeni sesibili kulimpelaviki kulomdlalo okhangelelwe ngabanengi phakathi kwamaqembu athi ele Dynamos lele Caps United esigodlweni ngensonto.
Umdlalo we Caps United le Dynamos yiwo omkhulu emidlalweni ekhona kulimpelaviki kodwa ingcitshi yomdlalo kanobhutshuzwayo uAzin Mdluli uthi leli kungaba lithuba elihle kuqembu le Highlanders ngoba lawamaqembu elakho ukuphazamisana.
Eminye imidlalo yangempelaviki izabe imi ngokulandelayo; ngoMgqibelo i Black Rhinos yemukela i Highlanders e Rufaro, i Njube Sundowns ile Mwana Africa e Pelandaba, i Caps FC izadibana le Lengthens e Gwanzura kuthi i Motor Action idlale le Chapungu e Motor Action Sports Club. NgeNsonto i Hwange yemukela i Monomotapa ngase malahleni, i Eastern Lions ile Masvingo United ngase Sakubva kuthi i Lancashire Steel izadibana le Shooting Stars eBbaghdad.
Intshantshu zomdlalo wokugijima immango emide ngenSonto zizabe zithe gwaqa ko Bulawayo lapho kumncintiswano we Bulawayo half marathon wona ozaqala uphinde uphelele enkundleni ye White City ngemva kokubhoda emalokitshini agoqela i Lobengula kanye le Nkulumane. Abazanqoba kuzo zonke izigaba zabesilisa labesifazane bakhangelelwe ukuthola izigidi ezilitshumi zamadola akuleli njalo onqobe nyakenye ngu Lewis Masunda.