UMongameli Robert Mugabe izolo ucothoze uMongameli George Bush welemelika emethesa icala lokwephula ilungelo loluntu ikakhulu emajele.
Esethula imbiko yakhe kudale lomnyano wamazwe womhlaba, iUnited Nations General Assembly eNew York uMongameli Mugabe uthe inkokheli yamanye amazwe imuthi nguntando kayiphikiswa ngoba esala ukuthi ilizwe leZimbabwe litshelwe okokwenza ngabahuquluzi benotho abazondela uhlelo lwakhe lokwaba kutsha umhlabathi. UMongameli Mugabe uthe lanxa uMongameli George bush welemelika emcothozile kulumhlangano lo ngoLwesibili kumele azinuke amakhwapha ngoba enganakekeli ilungelo loluntu njalo engalandeli umthetho njengalokhu akwenza eze athumbe ele Iraq.
UMugabe uthi iUnited Nations kumele ilandele izingqumo zayo hatshi ukweyisa amanye amazwe iqakathekisa amazwe athuthukileyo. Kumbiko yakhe ethethe imizuzo engamatshumi amabili uMongameli Mugabe uthe walahlekelwa yiminyaka elitshumi lane evalelwe entilongweni yabamhlophe walahlekelwa njalo yiminyaka elitshumi lanhlanu elwisana lombuso wobandlululo kodwa kazake afune ukuphindisela.
Asimuzweni uMongameli Mugabe ekhuluma: Silokhu sikudaba lunye amabandla aphikisayo asole umbiko kaMongameli Mugabe esithi kawulethi nguquko elizweni. Umsekeli wecele leMDC elikhokhelwa nguMnumzana Morgan Tsvangirai, uNkosazana Thokozani Khuphe uphe uChris Gande imbono yakhe ngaloludaba.
UChris Gande uphinde waxoxa njalo lonobhala jikelele wecele leMDC elikhokhokhelwa nguMnumzana Arthur Mutambara, uMnumzana Welshman Ncube ngembiko kaMongameli Mugabe.
Kunjalo nje ingcwethi kwezombusazwe lazo zithi amazwi kamongameli Robert Mugabe emhlanganweni lo atshengisa ubugwala bakhe ngoba eqambela umhlaba amanga esithi into zilungile kwele zimbabwe esesnzela ukuthi i UN ingathumeli esinye isikhonzi sayo ukuyahlolisisa umumo oselizweni. U Brenda Moyo we Studio 7 ukhulume loMnumzana Gorden Moyo, ongumqondisi we Bulawayo Agenda ngamazwi ka Mugabe la.