amalinks wokungena

Breaking News

I ZIMCODD Ithi Ele Zimbabwe Liyacwila Ezikheledeni


EleZimbabwe elibhekane lobunzima bokusilela kwezinto ezidingakalayo empilweni ukuze uzulu aphile likhanya lingesenelisi ukuthi libhadale izikweledi zalo phakathi kwelizwe kanye lezakwamanye amazwe.

Inhlanhlanganiso ebona ngezikwelede eye ZIMCODD esebenza isesigodlweni e Harare ithi uhulumende we Zimbabwe lokhe ecwila kuzikwelede ezikhanya sezimpica ngenxa yendubo zokusilela kwezinto ezifana lokudla, imithi yokwelapha kanye lamafutha ezimotha okuyikho osokwenze inotho yelizwe ihle iguqe ngamadolo ihle izikhanyele ukuthi ukuphakama lapho kungaba yisimanga.

Isiphathamandla se ZIMCODD eyincitshi njalo kwezenotho uMnumzana Joy Mabhenge utshele i Studio 7 e Harare ukuthi uhulumende we Zimbabwe ucine ukubhadala Izikwelede zakhe kunhlanganiso ezigoqela o World Bank, i African Development Bank le IMF ngeminyaka yabo 1997 kusiya ku 1998 yaphinda yabhadala esinye ku IMF engaba yizigidi ezedlula kancane amakhulu amabili zamadollar eMelika US$210 Million ukuze ingaxotshwa kuleyonhlanganiso.

Uthe ngenxa yalokhu ilizwe alisenelisi ukukweleda ngaphandle kwelizwe osokusenza ukuthi likwelede emikambo ephakathi kwelizwe ekweledisayo imali. U Mabhenge uthi ilizwe lilesikwelede esifika ku 8 trillion Zimbabwe dollars nxa sikhangela imali ekweledwe phakathi kwelizwe kodwa sifika ku 6 billion yama dollar akwele Melika nxa sikhangela isikwelede semali ekweledwe kwamanye amazwe. Uthe isikwelede lesi lokhe siqonga ethi alikho ithemba lokuthi singabhadalwa kokuphela umumo wezinto unje elizweni.

Uqhubekele phambili esithi kulomsebenzi omnengi okumele wenziwe nguhulumende kuleli ofana lokwakha izikolo, ukuthenga imithi yokwelaphisa ezibhedlela, ukulungisa imigwaqo lokuthenga ukudla kulokubhadala izikwelede esithi ngakhoke uhulumende ubanjwa ngamandla ukuqubekela phambili ekweleda.

Ezinye Indaba NgesiNdebele...

‚Äč
XS
SM
MD
LG