Inhlanganiso elwela ukulondolozwa kwelungelo leziziphepheli kweleSouth Africa eye People Against Suffering, Suppression, Oppression and Poverty (PASSOP) sisungule uhlelo lokubuthanisa imali ezanceda ukuyangcwatshwa eZimbabwe kuka Adonis Musati obeyisiphepheli sezimbabwe kwele South Africa njalo ubhubhele phandle kwenkamba yeziphepheli eseCape Town ngeviki edluleyo ebulawa yindlala.
Ubikwa ebesehlezi duzane lalinkamba okwesikhathi eside engatholi kudla emelele ukuthi anikezwe amaphepha okuba yisiphepheli esipheleleyo. Linhlanganiso iphinde yalobela inhlanganiso ye South African Human Rights Commission ikhonona ngomgchinisihlalo wenkamba yeziphepheli le uMnu Yoliswa Mzamande isithi nguye mathupha oyenza iziphepheli zeZimbabwe zicine sezisebunzimeni ngoba engafuni ukuthi zinikwe ukudla lamaphepha afaneleyo.
Izolo kubuthene izizalwane zeZimbabwe ezilikhulu eCape Town zithwele izinkwa zikhumbula umuyi. Sibelengxoxo loMnu Bongani Sithole isiphathamandla se PASSOP ochasisa ngamalungiselelo okubuyisela isidumbu sikaMusati eZimbabwe. Kusenjalo iWoza ibika ukuthi ilunga layo, unkosazana Maria Moyo obuhubhe ekuqaleni kweviki uzangchwatshwa ngeSonto. UMamoyo ubikwa ebegula kodwa isimo sakhe sasuka saba sibi ngemva kokuba ehlukunyezwe ngamapholisa.