Iziphathamandla ze Univesity of Zimbabwe lamuhla zixotshe uSean Matsheza kulikolitshi obengumsekeli kamkhokheli we UZ Student Council.
Iziphathamandla lezi zihlale idale lamuhla zithonisa uMatsheza ngecala lokukhuthaza ezinye izifundi ukuthi zibhlidlize impahla yalikolitshi kunyanga ezimbili ezedluleyo kuze kube lokutshengisela phezu kokukhwezwa kwembadalo yemfundo leyokuhlala kulikolitshi. Idale leli lihle lazisa uMatsheza ukuthi usexotshiwe kulikolitshi lamuhla.
Kusenjalo kulamalunga eZINASU amathathu abotshwe atshaywa kakubi ngamapholisa ngeSonto eKwekwe esemoteni evela koBulawayo. Amalunga la athi uMehluli Dube owayengumkhokheli wezifundi eNUST, uLawset Savadye oweBindura University, uWhitlow Mugwiji oweGreat Zimbabwe University kanye loStephen Chisungo loGordon Mukarakati abe Catholic University batshaywe kakubi ngamapholisa besetheswa icala lokuphatheka kwezombusazwe. Kodwa uMehlulio Dube uthi bebezivelela emhlanganweni ongelani lezombusazwe.