Silokhe sikudaba lokusilela kwemali elizweni lamuhla sixhume ilunga lekomidi ebona ngezemali edaleni lephalamende yona enxuswe ngusibalukhulu weReserve Bank uMnu Gideon Gono ukuthi imbize ezeveza amabizo abantu abenza imisebenzi yokungethembeki kwezenotho – uMnu Abednico Bhebhe njalo emela iNkayi kulelidale samdibanisa lengcwethi kwezenotho uMnu Rejoice Ngwenya abahlaziya udaba lokusilela kwemali lolu lokuthi lungaqedwa njani.
Umnu Bhebhe uthi amalunga eZanu PF yiwo wodwa enza limisebenzi kodwa uMnu Ngwenya uthi ngitsho, labeMDC labo bangaba bekwenza lokhu ngoba kungumhlambi kazelusile elizweni impunzi sisidla emini abantu besenza umathanda ngodaba lomnotho olungamanga kuhle.
UMnu Gono ngokwakhe uthi abanye babantu abenza ukungethembeki lokhu uyabazi njalo bakuhulumende. Amapholisa abika ukuthi adinga umgchinisihlalo wekomidi yezemali kudale lephalamende uMnu David Butau yena ocatshangelwa ukuthi laye wenza imisebenzi yokungethembeki (corruption) kanye lesiphathamandla esikhulu se Reserve Bank uMnu Jonathan Kadzura yena okubikwa kunguye obesebenzelana lowesifazane obanjwe eHarare ele $10 billion yemali entsha ekuqaleni kweviki.