Sekuqhamuke ingxabangxoza elizweni ngemva kokuba amabhanga eqhubeke elokhu esipha uzulu imali engama $200 000 esisele lamalanga amathathu kuphela ukuthi ibe ingasasebenzi.
Inengi ebelisemabhanga lamuhla libikwa licunulwe yikuphiwa limali abanye bahle bala ukuyithatha besesaba ukuthi kufika oLwesibili oluzayo, limali iyabe isiphongukuba ngumquba nje.
Abakumsebenzi wokuthenga njalo bethengisa imali yakwamanye amazwe labo bathi sebethwelenzima ngoba balezigidi zemali le abangasazi ukuthi bazayithini njengoba abantu sebesala ukuyithatha nxa bethengise imali yakwamanye amazwe.
Iziphathamandla zebhanga lesizwe, iReserve, zalile ukutshela istudio seven ukuthi ilanga lokungasebenzi kwalimali lizadluliselwa phambili na.
Esinye isakhamuzi sakoBulawayo, uMnu. Joseph Ncube, obesebhanga, utshele uChris Gande westudio 7 obekusenzakala lamuhla.
Kunjalo –nje, icele le MDC elikhokhelwa nguMnu. Morgan Tsvangirai lithi imizamo eyenziwa ngusibalukhulu webhanga elikhulu le Reserve, uMnu. Gideon Gono elokwenza imali enengi ngendlela yokuqeda uhlupho lokuswelakala kwemali iyafanana lokuthela amanzi emhlane wedada.
Kumbiko owethulwe yilelicele, umsekeli kamgcinisikhwama, uMnu. Elton Mangoma uthi uGono kumele ayekele umkhuba wakhe wokugcona abantu athi bagcina imali enengi ngoba ayisibo abayimpande yokusilela kwemali elizweni.
Kusenjalo, uMnu. Fletcher Dulini Ncube, uMgcinisikhwama wecele le MDC elikhokhelwa nguMnu. Arthur Mutambara, njalo emela i Magwegwe-Lobengula edale lephalamende utshele uSithandekile Mhlanga we studio 7 ukuthi amacebo ka Gono awancedi njalo uhlupho lwemali alusoze luphele ibandla le Zanu PF lisabusa.