Ngomnyaka ka 2007 inengi labaculi abadabuka eZimbabwe kanye labalingiseli kwezemidlalo yedrama bakhombise umsebenzi olohlonzi kakhulu njalo manengi amadlalade ethuliweyo.
Lamhlanje silonda uhambo lomnyaka ka2007 lwezizalwane zeZimbabwe ezikwele South Africa eziphethe ezamasiko lenhlalo kazulu. Umnyaka ka 2007 ukhombise isiphiwo esikhulu okwamagama kulabo abasemsebenzini wokufundisa lokuthokozisa uzulu ngezamasiko lenhlalo.
Abaqhuba imidlalo yokulingisela eyamadrama kanye labaculi ababaleke kwelikaMzilikazi bayabhacisa kwelikaTshaka yibo abebezibambe esidukwini lonyaka. Emculweni wezerumba bekubhicabhicana ososaziwayo abagoqela i-Ndolwane Super Sounds, Allen Ndoda and The Challengers, Collen Moyo and the African Brothers kanye leTornado Heroes. INdolwane Super Sounds ihwatshe elithi ‘Amaginqigonqo’ elikhale lazwela ezindlini ezinengi.
