Umgcinisihlalo weqembu lenguqu ele Highlanders u Mnu Enerst Sibanda uthi isigaba se Eastern Region sibaqhubisa kanzima ngoba sidala ukuba esigodlweni kube lamaqembu amanengi.
U Sibanda uthi kumele kubunjwe esinye isigaba se Central Region ukuze amaqembu asenkabazwe lase Mandebeleni athole ithuba lokudlala esigabeni saphezulu esithi lokhu kunganceda abadlali abanengi kulezondawo ngoba njengako Bulawayo kathesi kulabadlali abanengi abalesipho sokudlala abangasoze banelise ukudlala esigabeni saphezulu ngoba kulamaqembu amabili kuphela athi i Highlanders kanye le Sundowns.
USibanda ukhulume lokhu emncintiswaneni we Ezra Tournament obuko Bulawayo izolo lapho okunqobe khona iqembu le Nkulumane njalo limidlalo ibingenwe ngabadlali abanengi abadlala esigabeni se PSL kanye lakumaqembu aku Division One kanye labanye abadlala phandle kwelizwe.
Iziphathamandla ze Southern Region ngaphambili zike zaveza ukukhathazeka ngezenzo zokuba amaqembu adlala eseHarare adlale eku Eastern region ngoba lokhu kudala ukuba esigodlweni kucine kulamaqembu amanengi okusuka kube lula kulawo maqembu ngoba wona ayabe esekhaya loba engasiwo abanikazi benkundla ngalelosuku.
Sikhangele ezomdlalo kakhilikithi……imizamo yeqembu elimela ilizwe emdlalweni kakhilikithi eyokubuyela liyedlala imidlalo yohlobo lwama Test iqhubekela phambili kuhle njengoba leliqembu linqobe ele South Africa Composite x1 ngama runs 134 emdlalweni obuse Kimberly kwele South Africa ngempelansonto.
Lokhu bekungokwesithathu ukunqoba kwe Zimbabwe inqoba iqembu elifanayo kulumcintiswano obubizwa ngokuba yi Supersport Challenge. Odlale kuhle kuqembu le Zimbabwe ngu Sean Williams otshaye ama runs edlule ikhulu ikanti ku inninings yakuqala u Keith Dabengwa nguye owadlala kuhle. Lokhu kunqoba kutsho ukuba inhlanganiso ye ICC ilakho ukuvumela i Zimbabwe ukuba idlale njalo ama Tests yona esileminyaka phose emithathu ingawadlali.
Kusenjalo inhlanganiso ye Zimbabwe Cricket ithi uhambo lwayo lokuyadlala e Pakistan luyaqhubekela phambili loba nje kulelolizwe kulokungahlaliseki. I Zimbabwe kumele idlale imidlalo yama ODI emihlanu lele Pakistan njalo ikhangelelwe ukusuka mhlaka 11.