Owake waba ngumphathintambo wezokuthengiselana, uMnu. Nkosana Moyo ubikwa engomunye walaba abasebenzelana loMnu. Simba Makoni, ozancintisa isikhundla sokuba ngumongameli welizwe.
UMoyo waba ngowokuqala ukutshiya umesbenzi kuhulumende kaMongameli Mugabe. Watshiya umsebenzi esithi wehlulekile ukusebenzela lohulumende wasesiyahlala eMelika. Kodwa uMoyo ubikwa esuke eMelike ngempelasonto esesiyancedisa uMakoni ukukhankasa.
Isikhulumi sikamnu. Makoni, uMnu. Denford Magora utshele iStudio 7 ukuthi kangeke akhulume ngokuza kukaMakoni emkhankasweni wabo njengoba kuyikhona kuzakhulunywa amagama abantu abazasebenzelana lomakoni abanye abayiziphathamandla zeZanu PF. Esinye isiphathamandla seZanu PF ebesikhangelwe ukuziveza emhlanganweni kamakoni ozenziwa kobulawayo ngomgqibelo, nguMnu. Dumiso Dabengwa.
Kodwa uDabengwa ulandule lokhu lamuhla ekhuluma lephephandaba leChronicle. Ingcwethi ecubungula ezombusazwe, uMnu. Gordon Moyo utshele uChris Gande weStudio 7 ukuthi ukuza kumkhankaso kaMakoni kukaMoyo kulethelela lelicele isithunzi kodwa hatshi abantu abazavota.