Abezinkonzo bakhuthaza ukuthi uzulu weZimbabwe aqhubeke ngokuziphatha emelele impumela yokhetho lukamongameli engakaziswa sokwedlule amaviki amabili kwenziwe ukhetho.Amazwe omhlaba lenhlanganiso ezizimeleyo eZimbabwe lasemhlabeni jikelele asesole ukuphuza kokwethulwa kwalimpumela. Inhlanganiso ye SADC isikhuthaze inhlanganiso ebona ngokuqhutshwa kokhetho eye Zimbabwe Electoral Commission iZEC ukuthi iphangise ukwethula limpumela.
Umthethwandaba weHigh Court namhlanje unqume ukuthi udaba obelwethulwe yi MDC ekhokhelwa nguMnumzana Morgan Tsvangirai lokuthi impumela yokhetho iphangise ukwaziswa, aluqakathekanga, yalulahlela phandle. Ingxabangxoza yeZimbabwe le isithiye inengi lilenga nje emoyeni abantu bengazi ukuthi elakusasa limumetheni. Kodwa umfundisi Lucky Moyo isiphathamandla se Christian Alliance ukhuthaza uzulu ukuthi azibambe, kulondolozwe ukuthula elizweni.