Amacele womabili eMDC semanyene njalo azasebenza ndawonye akhethe umkhokheli oyedwa (chief whip) edaleni lephalamende.
Lokhu kuvezwe yinkokheli yamacele la emhlanganweni ewenze lentathelizindaba eJohannesburg, South Africa. Ekhuluma emhlanganweni lo, uMnu Morgan Tsvangirai, okade eloMnu Arthur Mutambara, uthe inkokheli yamacele womabili sivumelene ukusebenzelana ndawonye, lokhu okulakho ukubangela ukubambana kweMDC ibe libandla linye eyayivele iyilo ingakadabuki phakathi.
UMnu Tsvangirai wazise njalo ukuthi ukubambana kwabo lokhu sokusitsho ukuthi iZanu PF silibandla eliphikisayo ngoba iMDC silezihlalo ezinengi ephalamende. I MDC yona silezihlalo ezilikhulu latshumi, 110 kuthi iZanu PF ilezingamatshumi ayithobamunwe munye lasikhombisa 97.
UMnu Tsvangirai uveze njalo ukuthi iMDC izimisele ukusebenzelana loMnu Simba Makoni, yena ohlamuke kuZanu PF wancintisa kukhetho lukamongameli engusimayedwa, wathi njalo ibandla lakhe lizimisele ukusebenzelana labameli beZanu PF edaleni lephalamende abangabe befisa ukweqela kulelibandla.
Egcizelela amazwi kaMnu Tsvangirai uMnu Mutambara laye uthe icele lakhe likhethe ukusebenzelana lelika Mnu Tsvangirai ngoba amacele womabili ekunanzelela ukuthi alesitha esisodwa esiyi Zanu PF.
Silokhu sikudaba lunye, uMnu Abednico Bhebhe ongumsekeli wesikhulumeli secele likaMnu Mutambara uchasisele uNtungamili Nkomo weStudio 7 ukuthi ngempela bakhangelele ukusebenza belibandla linye lecele likaMnu Tsvangirai, wathi bayakujabulela ukuthi sebephethe intambo zedale lephalamende kanye lelesenate.