Amalunga ecele leMDC elikhokhelwa nguMnu. Morgan Tsvangirai abotshwe ephephele emahofisini elelibandla eHarare, iharvest house, ngoLwesihlanu olwedluleyo akhululiwe lamuhla.
Amalunga la abalekele imizi emaphandleni ngemva kokutshaywa kabuhlungu ngabasekeli bebandla leZanu PF, amasotsha labalwa impi yenkululeko. Osaphethe isikhundla sokukhokhela iMDC, uNkosazana Thokozani Khuphe uthi ukutshaywa lokuhlukuluzwa kwabasekeli bebandla lakhe kuqhubekela phambili endaweni ezinengi zelizwe.
UKhuphe, obeseMutare okubikwa kuphephele izakhamuzi zeManicaland ezedlula amakhulu amabili zibalekela ukubhaxabulwa ngama war vets labasekeli bebandla leZZanu PF, utshele uChris Gande weStudio 7 ukuthi amapholisa kawaphathisi ngalutho ngoba lawo encedisa abasekeli bezanu pf. Kudaba olufanayo, icele leMDC leli lithi kufe omunye umsekeli walo otshaywe ngabasekeli beZanu PF eShurugwi koNhema.
Isiphathamandla salelibandla enkabazwe, uMnu Obert Ncube utshele uChrs Gande weStudio 7 ukuthi uMichael Dube utshaywe ngemva kokhetho ngenyanga edluleyo waqhubeka egula waze wedlula izolo.
Inhlanganiso yamalungelo abantu eye Zimbabwe Human Rights Association Zimrights ithi inhlolisiso esanda kuyenza ikhomba ukuba udlakela lokhe lumemetheka elizweni. Intathelizindaba yethu u Mark Peter Nthambe iyalandisa.