Umeli welemelika kwele Zimbabwe, uAmbassador James McGee lamula wethekelele abahlukuluzeka ngodlakela olusaqhubeka elizweni, esibhedlela se Avenues Clinic e Harare.
Isiphathamandla salesisibhedlela uNkosikazi Patricia Tavaziva, ubikwa etshele uMcGee ukuthi sokwelatshwe abantu abedlula inkulungwane eziyisikhombisa, i 700 lokhu kwaqalisa udlakela lolu ngemva kokhetho lukaMbimbitho. Uthi lamuhla belapha abantu abangamatshumi amabili abalimele kakubi njalo abane basile ngentunjane ku Intensive Care Unit kodwa omunye wabhubha lamuhla ekuseni.
Ngemva kwaloluhambo, uMcGee utshele intathelizindaba ukuthi udlakela lolu luyadanisa njalo uzakhulumisana lo hulumende we Zimbabwe ngalo. uMcGee ubekhatshwe yiziphathamandla zezigodlo ze Sweden, Britain, Angola le Spain ezise Zimbabwe, njalo ezinye zazo zitshele intathelizindaba ukuthi ezikubonileyo kuhlasimulisa igazi.
Kunjalo-nje, inhlanganiso yabodokotela abalwela ilungelo loluntu, i Zimbabwe Association of Doctors for Human Rights kanye leye Zimbabwe Peace Project, zethule imbiko etshiyeneyo lamuhla ekhomba ukuthi udlakela lokhu luqhubeka ezigabeni ezitshiyeneyo zelizwe. Abalwa impi yenkululeko kanye labasekeli bebandla le ZANU PF abagoqela intsha lamasotsha, yibo ababikwa behlukuluza abasekeli becele le MDC elikhokhelwa nguMnu. Morgan Tsvangirai.
Isiphathamandla senhlanganiso yezifundi iZINASU, uLothando Makhubalo utshele istudio 7 ukuthi amalunga enhlanganiso yakhe ayahlukuluzwa kakhulu loba eziqhubela ezemfundo, ngoba ecatshangelwa ukuthi asekela ibandla le MDC. Esinye isakhamuzi se Lower Gweru, esingathandanga ukuqanjwa ngebizo, sichasisele uSithandekile Mhlanga we studio 7 ukuhlukuluzwa okwenzakala kulesisigaba.